Analitik.am-ը նախկինում անդրադարձել էր Լեռնային Ղարաբաղի Ճարտար գյուղից ՀՀ եկած, ամերիկյան երազանքը ղարաբաղյանի փոխած և տրեխներով ՀՀ ԱԺ վերահսկիչ պալատ հասած, հալալ քրտինքով հարստացած, վերոնշյալ պալատի իրավաբանական վարչության պետի տեղակալ՝ ՀՀԿ-ական պատգամավոր «Բառադի Համոյի» հալալ զուլալ փեսա Մուշեղ Սաֆարյանի ազգընտիր գործունեությանը:
Վերջերս խմբագրություն զանգահարեց մի քաղաքացի, ով ուշագրավ մանրամասներ հաղորդեց սույն հրաշամանուկի գործունեությունից, որը ավելի քան հիմք է տալիս եզրակացնել,որ Մուշեղ Սաֆարյանի տրեխները սովորական տրեխներ չեն,այլ արագընթաց՝ հագնելով դրանք այլևս ոչ մի արգելք անհաղթահարելի չէ, հնարավոր է նույնիսկ անհնարը՝ որքան էլ դա մարդկային բանականության և բարոյականության սկզբունքներից դուրս լինի:
Այսպես՝ ստորև ներկայացնենք կախարդական տրեխների հերթական արագացումը.
Պարզվում է , որ հանրահայտ Ֆինանսական բուրգի գործով, Մուշեղ Սաֆարյանն ունեցել է 50 տոկոս բաժնեմաս «Ամադեղա» ՍՊԸ-ին պատկանող ավազահանքում:Բաժնեմասը նրան տրվել է ամբաստանյալ Արթուր Անդրեասյանի կողմից, որպեսզի Սաֆարյանը , այսպես ասած, տանիք լինի այդ բիզնեսին:
Հավանաբար ամբաստանյալ Ա.Անդրեասյանը հստակ իմացել է կախարդական տրեխների մասին և Մուշեղ Սաֆարյանի Վերահսկիչ պալատում աշխատելը կամ «Բառադի Համոյի» փեսա լինելը այստեղ ընդհանրապես կապ չունի: Նույն ֆինանսական բուրգի գործով տրված ցուցմունքներով պարզվել է նաև,որ Մուշեղ Սաֆարյանը ոչ մի լումա անգամ չի ներդրել այդ հանքում: Այս փաստն ընդունել է նաև ինքն անձամբ, սակայն միևնույն ժամանակ հասցրել է, հավանաբար կախարդական տրեխների օգնությամբ, փոխառություն կնքել «Ամադեղա» ՍՊԸ-ի հետ՝ 17.000.000 ՀՀ դրամի չափով: Այնուհետև վաճառել է իր բաժնեմասը՝ երկու բնակարանի և ոչ բնակելի տարածքի դիմաց:
Սակայն Պետական ռեգիստրում վաճառքի գինը նշել է ընդամենը 25 000 ՀՀ դրամ և այժմ նոր սեփականատիրոջից պահանջում է անվավեր ճանաչել բաժնեմասի առուվաճառքը՝ պատճառաբանելով, որ չի ստացել առուվաճառքի 25 000 ՀՀ դրամը, իհարկե մոռացության մատնելով ստացված բնակարանները և տարածքը:
Ընդունեք, որ եթե մեր հերոսին սա էլ հաջողվի, ապա վստահաբար կարելի է նշել, որ նրա տրեխները ոչ թե արագընթաց են,այլ օժտված են հրթիռային շարժիչով:
Շարունակելի
