Նախկինում անդրադարձել էինք ՀՀ Վերահսկիչ պալատի իրավաբանական վարչության պետի տեղակալ, մեր տրեխներով հերոսին և նրա կախարդական տրեխներին:Անկեղծ ասած, մեր նյութերը մի քիչ հումորիստական էին և սարկազմով լի՝ նախատեսված հումորի զգացում ունեցող ընթերցողների համար:
Այդպիսի բազմաթիվ ընթերցողներ գտնվեցին, ովքեր ընդունելով հումորը խմբագրությունը հեղեղել էին նամակներով և կախարդական տրեխներ էին ուզում: Սակայն հումորը հումորով,բայց պարզվում է մեր տրեխներով հերոսը լուրջ է ընդունել, որ իրոք իր տրեխները կախարդական են և, ինչպես ինքն է շեշտում իր մտերիմների մոտ, իր ղարաբաղյան ծագումը իրեն թույլ է տալիս ամեն ինչ և հասել է այն աստիճանի , որ անցել է բացահայտ քցոցիին՝ այդ նպատակի համար փորձելով ծառայացնել իր պաշտոնը և ՀՀ դատական համակարգը:
Այսպես՝ ինչպես գրել էինք նախորդ հրապարակումներում, հայտնի ֆինանսական բուրգի գործով մեր տրեխներով հերոսին օդից մնացել էր ավազահանքի 50 տոկոս բաժնեմաս: Վերջինս այն մեկուկես տարի առաջ վաճառել էր՝ դիմացը վերցնելով 2 բնակարան նորակառույց շենքում և 250 ք/մ ոչ բնակելի տարածք: Բնականաբար, այդ ամենը առուվաճառքի պայմանագրում չի ֆիքսվել, որովհետև ավազահանքի բաժնեմասը վաճառվել է ընդամենը 25 000 ՀՀ դրամով:
Նոր սեփականատերն այնտեղ մոտ 160 000 ԱՄՆ դոլարի ներդրում է կատարել: Մեր հրապարակումներից հետո Մուշեղ Սաֆարյանն իրոք լուրջ է ընդունել, որ իր Ճարտար գյուղի տրեխները կախարդական են, և դիմել է դատարան՝ հայտարարելով, որ չի ստացել իր 25000 ՀՀ դրամը, ուստի հետ է պահանջում ավազահանքը: Ավելին՝ իր հայցադիմումում խոսք անգամ չկա իր կողմից վաճառքի համար արդեն իսկ ստացած գույքերի մասին: Փաստացի, ժողովրդական լեզվով ասած, Մուշեղ Սաֆարյանն ավազահանքի նոր սեփականատիրոջը նույնպես փորձում է քցել: Չենք կարող ասել, թե որքանով նրան կօգնի իր կողմից անընդհատ շահարկվող ղարաբաղյան ծագումը և կախարդական տրեխները, բայց նշենք միայն, որ ՀՀ վերահսկիչ պալատի աշխատակից Մուշեղ Սաֆարյանի այս գործողություններից, մեղմ ասած, վատ հոտ է գալիս,իսկ ավելի մեղմ ասած՝ ՀՀ քրեական օրենսգրքի 178 հոդվածի 3-րդ մասի հոտ (խոշոր չափերի խարդախություն):
Ինչևէ, դեպքերի հետագա զարգացումները ցույց կտան,թե մեր հերոսի կողմից մշտապես նշվող երկու հիմքերը՝ իր ծագումը (Ղարաբաղ) և Ճարտարի տրեխները, ևս մեկ անգամ կօգնե՞ն նրան, թե այս անգամ տրեխները կախաղան կհանվեն:
Շարունակելի
