ՁԻԱՀ-ի կանխարգելման հանրապետական կենտրոն այցի ընթացքում առողջապահության նախարար Արսեն Թորոսյանը նախարարի տեղակալ Լենա Նանուշյանի ուղեկցությամբ ծանոթացել է հոգեբանասոցիալական խորհրդատվության, համաճարակաբանական հսկողության, կանխարգելման, բժշկական օգնության և սպասարկման, լաբորատոր ախտորոշման բաժիններում կատարվող աշխատանքներին:
Կենտրոնի տնօրեն Սամվել Գրիգորյանը նախարարին, մասնավորապես, ներկայացրել է ՄԻԱՎ վարակի նկատմամբ համաճարակաբանական հսկողության ուղղությամբ ՄԻԱՎ/ՁԻԱՀ-ի ոլորտում ճանաչված միջազգային փորձագետի մասնակցությամբ անցկացվող ՄԻԱՎ վարակի վերաբերյալ կենսաբանական և վարքագծային հետազոտությունների ընթացքը, ՄԻԱՎ վարակով պացիենտներին տրամադրվող ծառայությունները կապված ՄԻԱՎ վարակի հակառետրովիրուսային բուժման, համակցված վարակների բուժման և կառավարման հետ, դիսպանսերային հսկողության շրջանակում տրամադրվող ծառայությունները՝ լաբորատոր-գործիքային հետազոտություններ, հոգեբանասոցիալական աջակցություն և այլն:
Մանրամասն ներկայացվել են ՄԻԱՎ-ի դեղակայունության մուտացիաների հայտնաբերման և գենոտիպի որոշման հետազոտություններ իրականացնող հանրապետությունում միակ լաբորատորիայի աշխատանքները: Տնօրենը նախարարին ծանոթացրել է նաև ՁԻԱՀ-ի կենտրոնի ուսումնակրթական, տարածաշրջանային գիտահետազոտական աշխատանքներին:
Նախարարը ծանոթացել է Կենտրոնի նոր կառուցված արևային ֆոտոէլեկտրական կայանի աշխատանքներին, ինչպես նաև լաբորատոր ախտորոշման և բժշկական օգնության և սպասարկման բաժինների նոր ենթակառուցվածքների ստեղծման և վերանորոգման աշխատանքների ընթացքին:
Քննարկվել են ոլորտում առկա խնդիրները և դրանց լուծման հնարավոր ուղիները:
