Հայաստանում ինտերնետային ու հեռախոսային կապ տրամադրող ընկերություններից Ucom-ը, որից Հայաստանում օգտվում են բազմաթիվ բնակիչներ և կազմակերպություններ, բառիս բուն իմաստով, շահագործում է օգտատերերի համբերությունն ու թանկարժեք ժամանակը: Ասածս հիմնավորելու և հստակեցնելու համար փորձեմ ավելի մանրամասն ներկայացնել Ucom-ի «անխափան» գործունեության մանրամասները:
Սկսեմ պայմանագրից՝ պարզ է, որ անձը, կամ կազմակերպությունը, ով ցանկանում է օգտվել տվյալ ինտերնետային կապից, պարտավորվում է կնքել պայմանագիր: Ընկերությունը կազմակերպություններին հրաժարվում է տրամադրել այլ փաթեթ, բացի կորպորոտիվ փաթեթներից, և դա հիմնավորում է նրանով, որ կորպորատիվ փաթեթների դեպքում կազմակերպությունները ապահովվում են անխափան կապով, որի պատճառով էլ հենց փաթեթների միջև առկա է գնային էական տարբերություն: Սակայն, կորպորատիվ փաթեթն ընտրելուց հետո օգտատերը շատ կարճ ժամանակահատվածում համոզվում է, որ այն, բացի գնային տարբերությունից, ուրիշ ոչնչով չի տարբերվում մնացած փաթեթներից:
www.analitik.am-ի խմբագրությունն բավականին նամակներ է ստացել բնակիչներից, ովքեր բողոքում են Ucom-ի տրամադրած ինտերնետային կայքից: Մենք զրուցեցինք մի շարք կազմակերպությունների հետ, ովքեր նույնպես դժգոհություններ հայտնեցին՝ ինտերնետային կապի վատ աշխատանքի հետ կապված: Մեր խմբագրությունը նույնպես օգտվում է Ucom-ի ինտերնետային կապից, ինչի արդյունքում կրկնակի վճար ենք կատարում այլ ինտերնետային կապ մատակարարող ընկերությանը՝ մշտապես անխափան կապ ունենալու համար, քանզի գրեթե ամեն օր Ucom-ի տրամադրած ինտերնետային կապը մեկ ժամով, երբեմն ավելի շատ, կորում է:
Իսկ այսօր՝ դեկտեմբերի 9-ին, ստիպված էինք մոտ երկու ժամ այլ ինտերնետային կապ օգտագործել, քանզի Ucom-ում կային տեխնիկական խնդիրներ,որի մասին, բնականաբար, ընկերությունն անգամ տեղյակ չի պահում իր հաճախորդներին: Ucom զանգահարելու ու ճշտելու դեպքում էլ հեռախոսազանգին պատասխանում է շատ հաճելու ու անհոգ ձայնով ավտոռոբոտը, որը տեղեկացնում է, որ ընկերությունում առկա են տեխնիկական խնդիրներ և անձնակազմն աշխատում է դրանք վերացնելու ուղղությամբ:
Վստահ եմ, որ տվյալ ինտերնետային կազմակերպության մատուցած ծառայությունից օգտվում են բազմաթիվ ընկերություններ, որոնք նույնպես կանգնում են տվյալ խնդրի առջև, ինչի արդյունքում ունենում են ֆինանսական կորուստներ, ինչպես նաև դա ազդում է տվյալ կազմակերպությունների վարկանիշի վրա՝ առավել ևս, եթե վերջիններս համագործակցում են օտարերկրյա կազմակերպությունների հետ:
Ucom ընկերությունը պայմանագիրը կնքելիս՝ անպայմանորեն շեշտը դնում է լավ որակի կապ տրամադրելու ու դրա փոխարեն՝ օգտատիրոջից գումարը ժամանակին գանձելու վրա, սակայն պայմանագրում որևէ կետով չի նշվում, որ վատ ծառայության դեպքում, մանավանդ, կորպորատիվ փաթեթից օգտվողներին, պետք է տրամադրվի փոխհատուցում՝ հասցված վնասների համար:
Ո՞վ է փոխհատուցելու Ucom-ի պատճառով կազմակերպությունների կորցրած անարդյունավետ ժամանակի ու դրա պատճառով ընկերությանը հասցված թե ֆինանսական, թե ռեսուրսային վնասների համար, գուցե այս հարցով դիմե՞նք ֆինանսների նախարարությանը, և խնդրենք վերջինիս անպատասխանատու կազմակերպությունից հավելյալ հարկեր գանձի տուժած կազմակերպությունների վնասները փոխհատուցելու համար :
Ներկայացնում ենք նաև ինտերնետային կապ տրամադրող կազմակերպության կայքի սքրինշոթն առանց մեկնաբանության:
