Այսօր Հայաստանյայց Առաքելական Ս. Եկեղեցին տոնել է Ս. Հռիփսիմյանց կույսերի հիշատակը:
Առավոտյան Մայր Աթոռ Սուրբ Էջմիածնից եկեղեցականների խաչվառազարդ թափորով բազմաթիվ ուխտավորների ուղեկցությամբ, Էջմիածնի Հայորդյաց տան սաների թմբուկների զարկերի ներքո, հավատավոր ժողովրդի խոնարհումի և օրհնության համար Սուրբ Հռիփսիմե վանք է տարվել սուրբ Հռիփսիմեի մասունքն ամփոփող Աջը: Սրբազան մասունքը կրում էր Մայր Աթոռ Սուրբ Էջմիածնի լուսարարապետ Գերաշնորհ Տ. Հովնան եպիսկոպոս Հակոբյանը:
Տոնի առիթով վանքում մատուցվել է Ս. Պատարագ: Պատարագիչն էր Ս. Հռիփսիմեի վանահայր Հոգեշնորհ Տ. Մատթեոս վարդապետ Պողոսյանը:
Ս. Պատարագի ավարտին կատարվել է Սրբուհու մասունքակիր Աջով հավատացյալների օրհնություն և Անդաստանի կարգ:
Տոնական արարողություններին մասնակցել են Մայր Աթոռի միաբաններ, տարբեր թեմերից ժամանած ուխտավորներ:
Տոնի առիթով տեղի է ունեցել նաև Ս. Հռիփսիմե վանքին հարակից փողոցի ցուցանակի բացումը. Էջմիածին քաղաքի ավագանու որոշմամբ օրեր առաջ այս փողոցն վերանվանվել էր Ս. Հռիփսիմեի անունով:
