Հունիսի 5–ին Մադրիդում մեկնարկած Դատական կատարողների միջազգային միության 22-րդ կոնգրեսի շրջանակում կստորագրվի Դատական կատարողների միջազգային միությանը ՀՀ ԱՆ դատական ակտերի հարկադիր կատարումն ապահովող ծառայության լիիրավ անդամակցության վերաբերյալ հուշագիրը, հաղորդում է Դատական ակտերի հարկադիր կատարման ծառայության մամուլի ծառայությունը։
Չորեքշաբթի մեկնարկած կոնգրեսին հայկական պատվիրակությունը գլխավորում է ՀՀ գլխավոր հարկադիր կատարող, արդարադատության գեներալ-մայոր Միհրան Պողոսյանը։ Ըստ օրակարգի` Միհրան Պողոսյանը հանդես կգա «Հասարակության իրազեկվածությունը հարկադիր կատարողի մասնագիտության վերաբերյալ» թեմայով ելույթով:
Դատական կատարողների միջազգային միության նախագահ Լեո Նետենի հրավերով Հայաստանի պատվիրակությունը եռօրյա աշխատանքային այցով գտնվում է Իսպանիայի մայրաքաղաք Մադրիդում։
22–րդ կոնգրեսն անցկացվում է «Հարկադիր կատարող՝ կապը օրենքի և տնտեսության միջև. նոր մոտեցումներ հարկադրանքին» խորագրի ներքո։