News.am կայքի հրապարակման համաձայն, Խաչատուր Սուքիասյանը ինչ-որ խորհրդավոր մարդկանց հետ քննարկում է օղակաձև զբոսայգում հյուրանոց կառուցելու նախագիծը:
Ռազմահայրենասեր գործարարն ապագա հյուրանոցը տեսնում է դուդուկի տեսքով: Խաչիկի հայրենասիրությունն արդեն ընդհուպ մոտենում է ռազմահայրենասիրության ջատագով մեկ այլ Խաչիկի՝ Ասրյանի մակարդակին:
Կարծում ենք Ասրյանը, հանձինս Սուքիասյանի, լուրջ մրցակից ունի: Օղակաձև զբոսայգում դուդուկ-հյուրանոցի քննարկումները պարզաբանելու նպատակով մենք փորձեցինք մեկնաբանություններ վերցնել տարբեր պաշտոնյաներից:
Պարզվեց՝ պատասխանատու պաշտոնյաներից որևէ մեկը տեղյակ չէր նման գաղափարի քննարկումներից: Մեր բոլոր զանգերն այս թեմայով առաջացնում էին ծիծաղի ու զվարճանքի նոպաներ հարցվողների մոտ: Օղակաձև զբոսայգում դուդուկ-հյուրանոցի մտահաղացման հեղինակին հետաքրքիր էպիտետներով էին նախշում:
Ի վերջո, քանի որ չհաջողվեց պարզել, թե այդ ո՞ր պաշտոնյայի հետ էր քննարկել այդ տխմարագույն միտքը Խաչատուրը, Analitik.am-ի խմբագրությունում շրջանառվում է երկու վարկած․
Վարկած առաջին.
Խաչիկ Սուքիասյանը որևէ մեկի հետ ոչինչ չի քննարկել, քանի որ նրան լուրջ վերաբերվող պաշտոնյաների քանակը Հայաստանում մոտեցել է զրոի:
Մենք քննարկեցինք, մենք որոշեցինք, մենք այսօր այստեղ ենք և շատ ուրախ ենք... Նմանատիպ արտահայտությունները Խաչատուրը փոխ է առել Արևի թագավոր Լյուդովիկոսից, ով սեփական անձի մասին խոսում էր հոգնակի թվով:
Վարկած երկրորդ.
Այս վարկածի հիմքը դուդուկ-հյուրանոց գաղափարի կատարյալ ապուշությունն է, հետևաբար նման միտք Խաչատուրը կարող էր քննարկել, ենթադրենք, իր թիկնապահ ՛՛Եզ՛՛ Արտաշի հետ:
