Տարիներ առաջ հայկական երաժշտությունը համեմվեց հայկական և հայերեն ռեփով: Ի հայտ եկան անուններ, որոնցից մի քանիսը մինչ օրս հիշվում, ճանաչվում և սիրվում են: Նրանցից մեկը ռեփեր Նարեկն է, ով չնայած երկար տարիներ ասպարեզում է, դեռ ունի ասելիք և իրենին էլ գումարում է նոր սերնդի ասելիքը: Analitik.am-ը զրուցեց Մեծ Հայքի Նարեկ Պետրոսյանի հետ իր այս տարվա կատարած աշխատանքների և տարավերջյան համերգի մասին, որը տեղի կունենա վաղը երեկոյան:
-Նարեկ նախ ներկայացրեք, թե ի՞նչ համերգ է լինելու վաղը և ովքե՞ր են մասնակցելու:
-Վաղվա համերգը այս տարվա ամենակարևոր ռեփ միջոցառումն է, քանի որ գրեթե մեկ տարի պատրաստվել ենք: Կարելի է ասել, որ տարվա ամփոփում և փակումն ենք անում: Ռուսաստանից եկել է «9 грамм»-ը, ազգությամբ հայ է նա, բայց Ռուսաստանում է ապրում և այնտեղ ավելի հայտնի է: «9 грамм»-ի հետ կար շփում սոց.ցանցերի միջոցով: Եղավ մեր կողմից առաջարկ և համաձայնեց գալ Հայաստան:
-Նկատել ենք, որ վերջերս սկսել եք համագործակցել երիտասարդ սերնդի հետ. այդպես է ստացվել, թե՞ նպատակային քայլ է:
-Կոնկրետ նպատակի համար է արվում: Ես՝ հասկանալով, որ երիտասարդների համար այս ասպարեզում կարող եմ ինչ-որ բան անել, փորձում եմ հնարավորին չափ աշխատել նրանց հետ, աջակցել, որ պոտենցիալ ունեցողները կարողանան իրենց տեղն ամրապնդել հայկական ռեփում:
-Նոր սերնդի մեջ տեսնո՞ւմ եք դեմքեր, որոնց այնքան կհիշեն, որքան տարիներ առաջ Ձեզ և ևս մի քանի հայ ռեփերների:
-Դեռ հիմա վաղ է այդ մասին խոսել, քանի որ նոր են սկսում նրանք, բայց կան մի քանիսը, որոնք արդեն ինչ-որ քայլեր անում են, արդեն ունեն լսարան: Ինչպես մնացած բոլոր ասպարեզներում, այնպես էլ ռեփում, ժամանակը ցույց կտա, թե ով կմնա: Ռեփը գումար աշխատելու տեսանկյունից ոչ այնքան արդյունավետ է, և այս պատճառով մինչև վերջ գնացողները շատ չեն. մնում են միայն նվիրյալները:
-Իսկ համամի՞տ եք այն մտքի հետ, որ հիմա ռեփ ասպարեզում մի փոքր լճացում է նկատվում, և հենց Ձեզ եթերում ավելի քիչ ենք տեսնում:
- Այդքան էլ համամիտ չեմ, քանի որ ընդհանուր առմամբ բոլորն էլ աշխատում են: Ես իմ մասին կարող եմ խոսել, և ասել, որ այս տարի շատ ակտիվ գործունեություն եմ ծավալել, բայց հիմա հեռուստատեսությունների հետ ակտիվ չեմ աշխատում: Մեկ տարի տեսահոլովակներ չէի տալիս TV-ներին, քանի որ համացանցային շուկան ավելի հասանելի և ավելի բավարար էր: Իմ արվեստով հետաքրքրվողներն ինձ լսում են համացանցում: Մյուս տարի հնարավոր է փոխեմ մոտեցումս և նորից աշխատեմ հեռուստատեսությունների հետ, բայց այս տարի էլ ես շատ տեսահոլովակներ եմ նկարել թե՛ Հայաստանում, թե՛ ԱՄՆ-ում:
Արմինե Բրսոյան
