«Իսլամական պետություն» ահաբեկչական խմբավորումը հայտարարել է Հյուսիսային Կովկասում իր «վիլայեթի» (նահանգի) ստեղծման մասին: Ինչպես հաղորդում է Lenta.ru-ն` այս տեղեկությունը տարածել է Institute for the Study of War աղբյուրը` վկայակոչելով ԻԼԻՊ-ի մամլո քարտուղար Աբու Մուհամադ ալ-Ադնանիին:
Աղբյուրը գրում է, թե «Կովկասի վիլայեթի» ստեղծման մասին հայտարարվել էր Դաղստանի, Չեչնիայի, Կաբարդինո Բալկարիայի մի շարք ռազմական խմբավորումների ղեկավարների` ԻԼԻՊ-ի առաջնորդ Աբու Բաքր ալ-Բագդադիին հավատարմության երդում տալուց հետո: Երդման արարողությանը մասնակցել են այսպես կոչված` «Կովկասի էմիրություն» խմբավորման ահաբեկիչները, որը կապ ունի «Ալ-Կաիդայի» հետ:
ԻԼԻՊ-ը Իրաքում հայտնվել է 2006-ին: 2014-ի ամռանը խմբավորման զինյալները վերահսկողություն են հաստատել Սիրիայի և Իրաքի որոշ տարածքներում, խալիֆայություն են հռչակել` Մոսուլ մայրաքաղաքով:
