2015-ին Միշոն լքեց ցանկալի փեսացուների շարքն՝ ամուսնանալով ամերիկաբնակ պրոդյուսեր Սոնա Հովհաննիսյանի հետ: Ռեփերի կինը BRAVO.am-ի հետ բացառիկ զրույցում պատմել է իր ընտանիքի, աշխատանքում ունեցած հաջողությունների, Լարի Քինգի հետ համագործակցության, ինչպես նաեւ այն մասին, թե ինչպիսի ամուսին է Միշոն:
-Որո՞նք էին Միացյալ Նահանգներում հաստատվելու Ձեր շարժառիթները:
-Փոքր երեխա էի, երբ տեղափոխվեցինք Լոս Անջելես, այսպիսով, որոշումն իմը չէր: Ծնողներս նկարիչներ են, ԱՄՆ-ում իրենց համար ավելի մեծ հնարավորություններ կային: Վերջին տարիներին Հայաստան հաճախ ենք գալիս` մեր հարազատներին, ընկերներին տեսնելու, եւ բացի այդ, մենք հայաստանյան շատ նախագծերում ենք ներգրավված: Հայրս է հանդիսանում հորեղբորս` «Ոսկեվազ» գինու գործարանի զբոսաշրջային համալիրի նախագծի հեղինակը, մայրս «The Simpsons»-ի անիմատոր է եւ այս ամառ հրավիրված է «Թումո»-ում վարպետության դաս անցկացնելու:
-Ի՞նչ մասնագիտություն ունեք եւ ինչպե՞ս է դասավորվել Ձեր կյանքն օվկիանոսից այն կողմ:
-Ամերիկյան շոու-բիզնեսում եմ աշխատում: Երբ սովորում էի UCLA-ում (Լոս Անջելեսի կալիֆորնյան համալսարան), որոշել էի հեռուստատեսային պրոդյուսեր դառնալ, բայց այդ ճանապարհը տարավ ինձ նաեւ դեպի հաղորդավարություն, դերասանություն, մոդելային գործունեություն: Որպես պրոդյուսեր բազմաթիվ գործառույթներ ունեմ ՝ երբեմն ստեղծում եմ հեռուստատեսային շոուներ, երբեմն կապ հաստատում հայտնի մարդկանց հետ` շոուին հրավիրելու համար, որոշում եմ մոնտաժային հարցերը, նաեւ թե որ ցանցերում ծրագիրը կարող է տեղադրվել եւ այլն:
Ես իսկապես հաճույք եմ ստանում նկարահանվելուց, բայց առավել գնահատում եմ աշխատանքս որպես պրոդյուսեր, որովհետեւ այն ինձ ստեղծագործական վերահսկողության հնարավորություն եւ այս մրցակցային ոլորտում հարգանքի այլ մակարդակ է տալիս:
-Ինչպե՞ս եք վերաբերվում Ձեր ամուսնու աշխատանքին, ի՞նչ կասեք նրա լսարանի եւ երկրպագուների մասին:
-Հպարտանում եմ իր արած աշխատանքով: Բացի այն, որ հիասքանչ երաժշտություն է ստեղծում, կարծում եմ, որ շատ խիզախ քայլ էր սկսել գործունեություն ծավալել բոլորովին նոր ժանրում: Միշոն շատ խոհուն անձնավորություն է, հետեւաբար, նրա գրած խոսքերն էլ այնքան իմաստալից են, նրա մտքերը հրահրող են, եւ նա անդրադառնում է կարեւոր բազմաթիվ սոցիալական խնդիրների: Ես տեսնում եմ` ինչպես է իր անհատականություն լինելը ոգեշնչում երիտասարդներին համարձակություն ունենալ տարբերվելու ամբոխից, ու դա ինձ շատ է դուր գալիս: Մի անգամ հարցրի նրան, թե ինչու այլեւս իր նոր տեսահոլովակները չի ներկայացնում հեռուստատեսությամբ, նա էլ պատասխանեց, որ նրանք, ովքեր հետեւում են իր երաժշտությանը, համացանցում էլ կգտնեն այդ երգերը: Ասացի նրան, որ կարծում եմ` մեր մշակութային կյանքի համար շատ կարեւոր է, որ իր նոր տեսահոլովակները հեռուստատեսությունում հայտնվեն, որովհետեւ նա լավ օրինակ է շատերի համար, եւ մեր երիտասարդության համար կարեւոր է տեսնել բազմազանություն ամեն բնագավառում: Կարեւոր չէ` համաձայնում ես իր աշխարհայացքի հետ, թե՝ ոչ, կարեւորն այն է, որ միտքը հրահրում է շատերին` առաջացնելով երկխոսության հնարավորություն: Նրա երգերը մարդկանց ստիպում են մտածել, թե ինչին են հավատում, եւ հետո, վերջին հաշվով, նրանք անում են սեփական եզրակացությունները: Միշոն բազմաթիվ հիասքանչ երկրպագուներ ունի, ովքեր գնահատում են իրեն, ինչպես ես:
-Իսկ ի՞նչը կարող է վեճի թեմա լինել Ձեզ համար:
-Հավանաբար, միայն մեր մտերիմ ընկերներն ու ընտանիքի անդամները կհավատան ասածիս, բայց մենք երբեւէ չենք կռվում: Կարծում եմ, որովհետեւ միեւնույն արժեքներն ունենք ու ինչ էլ լինի, մենք երբեք միմյանց դեմ չենք, մենք միշտ նույն թիմից ենք: Կարծում եմ` նորմալ է, որ ամեն հարցում չէ, որ համակարծիք ենք, բայց կարեւորն այն է, որ տարաձայնությունները լինում են միայն հարգանքի ու միմյանց մասին հոգ տանելու մոտեցմամբ: Երկուսիս համար էլ առաջնահերթ են միմյանց զգացմունքները, մնացած ամեն ինչ երկրորդական է:
Մանրամասները՝ սկզբնաղբյուր կայքից։
