SHAMSHYAN.com-ի տեղեկություններով` ոստիկանության Եղեգնաձորի բաժնի հետաքննչական բաժանմունքում նյութեր են նախապատրաստվում հուլիսի 27-ին Վայոց Ձորի մարզում տեղի ունեցած միջադեպի փաստով։
Ժամը 22։30-ի սահմաններում ոստիկանության Եղեգնաձորի բաժին ահազանգ է ստացվել Արտաբույնք գյուղի բնակիչ՝ 41-ամյա Սյուզաննա Վ-ից, ով հայտնել է, որ ժամեր առաջ Գողթանիկ գյուղի «Համալիր» կոչվող տարածքում անձնական հարցերի շուրջ վիճաբանություն է տեղի ունեցել, որի ժամանակ Գողթանիկ գյուղի բնակիչ Համբարձում Ս-ն իր որդու՝ Անդրանիկ Ս-ի հետ ծեծի են ենթարկել և իրեն, և իր եղբորը՝ Սաշա Վ-ին։
Այնուհետև դեպքի վայր ժամանած ոստիկաններին Սյուզաննա Վ-ն հայտնել է, որ Համբարձում Ս-ն հրել, գցել է իրեն, ինչի հետևանքով աջ թևի շրջանում վնասվածք է ստացել, իսկ հետո Համբարձում և Անդրանիկ Ս-երը քարերով և փայտերով հարվածներ են հասցրել իր եղբորը, ով մարմնի տաբեր մասերում վնասվածքներ է ստացել։
Մինչ Եղեգնաձորի ոստիկանները լսում էին Սյուզաննա Վ-ին, ոստիկանության Եղեգնաձորի բաժին է դիմում Համբարձում Ս-ն՝ հայտնելով, որ Սյուզաննա Վ-ի մատնանշված վայրում նա և իր եղբայրը, ով Արարատի մարզի բնակիչ է, ծեծի են ենթարկել իրեն փայտերով և դույլով, որից հետո Սյուզաննան փայտերով հարվածել է իր որդուն։
Համբարձում Ս-ն հայտնել է նաև, որ ինքը և իր որդին մարմնական վնասվածքներ են ստացել։ Փաստի առթիվ նախապատրաստված նյութերի շրջանակում հետաքննիչի որոշմամբ նշանակվել է դատաբժշկական փորձաքննություններ։
SHAMSHYAN.com-ի տեղեկություններով՝ Համբարձում Ս․-ն Վայոց Ձորի մարզի Գողթանիկ գյուղի վարչական շրջանի ղեկավարն է։
