Հատուկ Քննչական ծառայությունը ապօրինի է համարում ՀՀ 2-րդ նախագահ Ռոբերտ Քոչարյանի խափանման միջոցը փոխելու մասին Վերաքննիչ քրեական դատարանի որոշումը: Այս մասին տեղեկանում ենք Aysor.am-ից, որն էլ հղում է անում ՀՔԾ-ին:
«Մեր գնահատմամբ, Վերաքննիչ քրեական դատարանի որոշումն ապօրինի է։ Մենք հույս ունենք՝ Գլխավոր դատախազությունը Վճռաբեկ դատարան բողոք կներկայացնի», - ասել են ՀՔԾ-ից։
Ինչ վերաբերում է Գլխավոր դատախազությանը, ապա առայժմ հայտնի չէ՝ Վճռաբեկ դատարան բողոք ներկայացնելու է դատախազությունը, թե ոչ: Ավելի վաղ դատախազությունից հայտնել էին, որ Վերաքննիչ դատարանի որոշումը ստանալուց հետո միայն կքննարկեն Վճռաբեկ դատարան դիմելու հնարավորությունը։
Հիշեցնենք, այսօր Հայաստանի Վերաքննիչ քրեական դատարանը՝ դատավոր Ալեքսանդր Ազարյանի նախագահությամբ, որոշեց բավարարել ՀՀ 2-րդ նախագահ Ռոբերտ Քոչարյանի պաշտպանական խմբի վերաքննիչ բողոքը։
Դատարանի շենքից դուրս գալուց հետո փաստաբան Ռուբեն Սահակյանը հայտարարեց, որ դատարանը վերացրել է Երևանի ընդհանուր իրավասության դատարանի որոշումը՝ հաշվի առնելով, որ Ռոբերտ Քոչարյանը անձեռնմխելի է։
