Կառավարության նիստից հետո ՀՀ Մարդու Իրավունքների պաշտպան Արման Թաթոյանը, լրագրողների հետ զրույցի ժամանակ խոսելով Արցախի ՄԻՊ Ռուբեն Մելիքյանի հրաժարականի մասին, ասաց, որ վերջինս բացատրություններ տվել է, իսկ ինքը միայն կարող է ասել, որ Մելիքյանի հետ աշխատանքի և վերջինիս ջանքերի շնորհիվ հնարավոր է եղել նոր որակ հաղորդել իրավապաշտպան աշխատանքին և ցույց տալ, որ տարածքի քաղաքական կարգավիճակը չպետք է նշանակություն ունենա իրավունքների պաշտպանության համար:
ՀՀ ՄԻՊ-ը նշեց, թե ամեն ինչ պետք է անել, որ Արցախը ժողովրդավարության տեսանկյունից ճանաչելի դառնա աշխարհին, ինչը շատ կարևոր է։
Ինչ վերաբերում է Ազգային ժողովում ԱԱԾ տնօրենի և ՀՔԾ պետի հեռախոսազրույցի գաղտնալսումից հետո ստեղծված Քննիչ հանձնաժողովին մասնակցության հրավերին, Թաթոյանը հայտարարեց, որ հրավերի դեպքում կքննարկի՝ հավելելով, որ առհասարակ հեռախոսային խոսակցությունների գաղտնիությունը, դրա պաշտպանվածությունը ՄԻՊ-ի աշխատանքի ուղղություններից է։
