Երեկ մամուլում տարածվեցին լուրեր այն մասին, որ հոկտեմբերի 23–ին Երևանի Բրյուսովի անվան լեզվահասարակագիտական համալսարանում արտառոց դեպք է տեղի ունեցել: Նշվում էր, որ վնասվածք են հասցրել 20-ամյա ուսանողուհու։ Այս մասին իր ՖԲ էջում գրել էր նաև Երևանի ավագանու անդամ Իզաբելլա Աբգարյանը՝ նշելով, որ իրեն այդ մասին հայտնել են ուսանողները, և տեղեկությունը ստուգման կարիք ունի:
Ոստիկանությունն այսօր տարածեց պաշտոնական հայտարարություն, որով տեղեկացրեց, որ ուսանողուհին բացատրություն է տվել և հայտնել է, որ ոչ ոք չի վնասել իրեն, որևէ մեկի կողմից հարձակում չի եղել:
Analitik.am-ը զրուցեց ԵՊԼՀ-ի նախկին դասախոս, «Իմ Քայլը» դաշինքի անդամ Իզաբելլա Աբգարյանի հետ, ով ասաց, որ բոլոր տարածված լուրերը բերնեբերան անցած, ուռճացված ասեկոսեներ են և չեն համապատասխանում իրականությունը. «Ցավոք, մանրամասներին տեղյակ չեմ, բայց ըստ Բրյուսովի պրոռեկտոր Բելա Մարգարյանի պարզաբանման, ոչ մի դանակահարություն և երակները կտրել չի եղել»:
Աբգարյանի խոսքերով, երեկ համալսարանի ուսանողներից իրեն հայտնել են, որ ԶԼՄ-ները կատարվածը չափազանցված են ներկայացնում:
Այսօր՝ Երևանի Վ.Բրյուսովի անվան պետական լեզվահասարակագիտական համալսարանն իր ֆեյսբուքյան էջում տեղադրած հայտարարության մեջ էլ նշել է, որ լրագրողների և լրատվամիջոցների հետ բաց և թափանցիկ աշխատելու գործելաոճ ունեն որդեգրած:
Ըստ տեղադրված հայտարարության, լրատվամիջոցներն այս անգամ անցել են բոլոր թույլատրելի սահմանները՝ գրելով չստուգված, մտացածին և անհիմն տեղեկություններ այն մասին, թե իբր համալսարանի ուսանող չհանդիսացող երեք աղջիկ մուտք են գործել համալսարան, դաժանաբար ծեծի ենթարկել մի ուսանողուհու, այնուհետև դանակահարել նրան:
Նշենք, որ Analitik.am-ը երեկ փորձում էր կապ հաստատել ԵՊԼՀ-ի հետ՝ պարզելու համար իրականությունը, սակայն մեր զանգերին չէին պատասխանում:
