Իմ ռոմանտիկ քայլերը միայն անձնական կյանքում են. Վահե Էնֆիաջյան

Analitik.am-ի ամանորյա բլից հարցերին պատասխանում է «Բարգավաճ Հայաստան» խմբակցության պատգամավոր Վահե Էնֆիաջյանը:

 

- Պարոն  Էնֆիաջյան, սիրո՞ւմ եք Ամանորը:

 

- Ամանորն ու Սուրբ Ծնունդն  իմ ամենասիրելի տոներից են: Հատկապես հաճելի է նորի, նոր կյանքի և նոր  տարվա սպասումը:

- Որտե՞ղ  և ո՞ւմ հետ եք նշելու Նոր տարին:

 

- Ինչպես ամեն տարի, այս տարի նույնպես նշելու եմ  ընտանիքիս, ընկերներիս և մտերիմներիս  հետ:

-  Հավատո՞ւմ եք ամանորյա հրաշքներին:

 

- Կյանքն արդեն հրաշք է...

- Ո՞րն է Ամանորին Ձեր ստացած ամենաանմոռանալի նվերը:

 

- Այդպիսիք շատ են, չեմ ցանկանում որևէ մեկն առանձնացնել:

-  2014-ի Ձեր ամենառոմանտիկ քայլը...

 

- Իմ ռոմանտիկ քայլերը միայն անձնական կյանքում են:

-  Ամենաթանկարժեք իրը, որ ստացել եք :

 

- Նվերի արժեքը չեմ կարևորում: Կարևորը ուշադրության, սիրո և հարգանքի դրսևորումն է: Անգամ շատ փոքր արժեք ունեցող նվերը, եթե մատուցվում է մեծ սրտով, արդեն դառնում է թանկարժեք:

-  Ձեր մասին ամենաանհեթեթ հրապարակումը...

 

- Անհեթեթություններին ուշադրություն չեմ դարձնում:

 

-  Ի՞նչն է ձեզ հունից հանում:

 

- Անարդարությունը, սակայն անգամ ծայրահեղ լարված իրավիճակներում   աշխատում եմ ինձ հանգիստ  և  հավասարակշռված պահել: 

-  Համամի՞տ եք, որ բարությունը կփրկի աշխարհը:

 

- Իհարկե, բայց միայն բարությունով փրկություն չի լինի, հարկավոր են ավելի գործնական քայլեր, կամեցողություն, հարգանք և սեր դեպի մարդկությունն ու բնությունը:

- Ի՞նչն է խանգարում մարդկանց երջանիկ լինել:

 

- Միմյանց հանդեպ սիրո, ջերմության  և բարության պակասը:

- Տարին այծի է. ի՞նչ սպասենք այծից:

- Սնահավատ չեմ: Սպասելիքներս ռեալ են և մարդկային:

 

- Սխալ, որի համար զղջում եք...

 

- Արածներիս համար չեմ զղջում: Այն, ինչ եղել է, այլևս փոխել հնարավոր չէ:

- Ավանդական բուդ լինելո՞ւ է սեղանին:

 

- Ոչ:

- Երկրում այս տնտեսական ճգնաժամից դուրս գալու ի՞նչ ուղիներ եք տեսնում:

 

- Տնտեսական ճգնաժամից դուրս  գալու համար հարկավոր է այդ գործը թողնել այն մարդուն, ով տնտեսության մեջ գործնական հաջողակ քայլեր է անում:   Եվ, առհասարակ, երկրի սոցիալ-տնտեսական խնդիրների լուծման ուղին միասնական  և վճռական պայքարն է: Այդ պայքարն էլ կտա մի շարք փոփոխություններ, որոնք երկիրը դուրս կբերեն  ստեղծված ծանր իրավիճակից:

- Ինչպիսի՞ն եք ուզում տեսնել 2015 թվականը:

 

- Ամենակարևորը՝ լինի խաղաղության և բարեկեցության տարի:

- Սովորաբար որքա՞ն գումար եք ծախսում ամանորյա սեղանի համար:

 

- Ամեն տարի տարբեր է լինում: Երբեք  չենք կենտրոնանում շքեղության կամ արժեքի վրա: Կարևորը ջերմ և հաճելի մթնոլորտն է, մնացածը` երկրորդական բաներ են:

 

- Ո՞րն է 2014 թվականի քաղաքական ամենամեծ կորուստը և ձեռքբերումը:

 

- Մեծ ձեռքբերում եմ համարում հայ ազգի՝ ապագայի և սեփական ուժերի նկատմամբ  հավատի և վստահության բարձրացումը: Քաղաքական կորուստներ չունենք, պարզապես  եղան բացահայտումներ, որոնք օր առաջ էին անհրաժեշտ:

- Կա՞ ընտանիք, որին, որպես ավանդույթ, օգնում եք այս օրերին:

 

- Այսպիսի նախաձեռնությունները  չեմ հրապարակում:

- Analitik.am-ի կազմակերպած ԱՍ մրցանակաբաշխությանը Դուք ճանաչվեցիք «Հասարակության վստահությունը վայելող տարվա քաղաքական գործիչ»: Դա պարտավորեցնո՞ղ պարգև է, և առհասարակ, ինչպե՞ս եք վերաբերվում նման միջոցառումներին:

 

- Բնականաբար, որպես քաղաքական գործիչ՝  իմ աշխատանքի գերակշիռ մասը հենց հասարակության հետ է: Հասարակության տարբեր շերտերի հետ շփումն օգնում է ճանաչել քաղաքացուն, հասկանալ նրան հուզող հարցերն ու խնդիրները: Մեծ պատասխանատվություն է այս աշխատանքի ընթացքում վաստակել ժողովրդի վստահությունն ու հարգանքը: Այն հասարակության կողմից իմ աշխատանքի գնահատականն է, իսկ դա ինձ համար ամենակարևորն է: Քանի որ վստահությունն ապացուցում է, որ իմ աշխատանքն իզուր չի եղել և տվել է իր պտուղները: Այդ գնահատականը պարտավորեցնում է է՛լ ավելի լայն թափով, և է՛լ ավելի ոգևորությամբ աշխատել:
Այսպիսի միջոցառումները, բնականաբար, կարևոր են, քանի որ արտացոլում են քաղաքական գործչի կատարած աշխատանքի արդյունքները:

 

- Ինչպիսի՞ մաղթանքներ կհղեք հայ ժողովրդին և Analitik.am-ի ընթերցողին:

 

- Ի սրտե շնորհավորում եմ բոլորի Ամանորն ու Սուրբ Ծնունդը, մաղթում առողջության, երջանկության և բարեկեցության տարի: Այս նոր տարում թող բոլոր ընտանիքներում լինի խաղաղության և երջանկության մթնոլորտ:

 

 

Զրուցեց` Հասմիկ Մովսիսյանը