Մանուկ ժամանակ ես երազում էի, որ Ձմեռ պապիկից կստանամ ծովային պատերազմական «Մորսկոյ բոյ» խաղալիքը:
Analitik.am-ի ամանորյա բլից հարցերին պատասխանում է ԱԺ «Ժառանգություն» խմբակցության պատգամավոր Թևան Պողոսյանը
- Պարոն Պողոսյան, սիրո՞ւմ եք Նոր տարին, եթե այո, ինչո՞ւ:
- Սիրում եմ, որովհետև ամենահաճելի, տոնական, ընտանեկան տոնն է. բացի այդ, նոր գաղափար նշող տոն է: Այդ իմատով էլ ինքը ամենալավերից մեկն է մեր կյանքում, որը հավեսով նշում ենք:
- Որտե՞ղ եք նշել Ամանորը:
- Ամբողջ իմ կյանքում Նոր տարին մեր տանը, ընտանիքիս հետ եմ նշել:
- Կարո՞ղ եք հիշել Ձեր ամանորյա ամենահիշարժան նվերը:
- Մի քանիսն են, դժվար է կոնկրետ ասել. Այստեղ տարիքի խնդիրը նաև կա: Օրինակ, մանուկ ժամանակ ես երազում էի, որ Ձմեռ պապիկից կստանամ ծովային պատերազմական «Մորսկոյ բոյ» խաղալիքը: Իսկ ավելի մեծ տարիքում երազում էի, որ ընտանիքս ուրախ, երջանիկ ժպտադեմ կողքս նստած կլինի: Այնպես որ, իր տարիքային իմաստով տարբեր է: Բայց ես ուրախ եմ, որ չի եղել որևէ Նոր տարի, որ իմ ուզածիս պես չլիներ:
- Նվերնե՞ր եք սիրում անել, թե՞ ստանալ:
- Ես ավելի շատ սիրում եմ նվիրել:
- 2014-ն ինչպիսի՞ն էր Ձեր տեսանկյունից:
-Ուրախ եմ, որ ընտանիքումս ամեն ինչ լավ էր. հիվանդ մարդ չունենք, ամեն ինչ իր տեղում է: Եթե աշխատանքային պահով վերցնենք, այո, շատ ծրագրեր անհնարին եղավ իրականացնել: Դրանից ես ինձ ոչ թե վատ եմ զգում, այլ փորձելու եմ հաջորդ տարի դրանք կյանքի կոչել:
- Ի՞նչ սպասելիքներ ունեք 2015-ից:
- Այն, ինչ երազում եմ, ցանկանում եմ, որ կատարվեն. Կմաղթեմ, որ 2015-ը առողջության, խաղաղության, բարեկեցության տարի լինի և Աստված տա այնպես լինի, որ որևէ մեկը իմ կյանքում չպակասի:
- Եթե գաղտնի չէ, որքա՞ն գումար եք ծախսել ամանորյա տոնակատարության համար:
- Փորձել ենք համեստ ձևով նշել. Դժվար է հաշվարկել այդ գումարը, քանի որ փոքրիկ երեխա ունենք և Ձմեռ պապիկին ուղղված խնդրանքները տարեց տարի փոխվում են:
- Կա՞ ընտանիք, որին, ավանդույթի կարգով, օգնում եք այս օրերին:
- Ընդհանրապես, մեր ընտանիքի կողմից օգնությունները չեն սահմանափակվում միայն Նոր տարով, և ամեն ամիս փորձում ենբ ինչ-որ բան անել, բայց դրա մասին չեմ սիրում խոսել. այն անձնական է: Կոնկրետ Նոր տարվա հետ կապված` հնարավորինս օգնում եմ ծնողներիս, փորձում եմ օգտակար լինել: Ես ունեմ նաև իմ կողմից պատրաստած սեփական նվերը, ինչը ինքս եմ պատրաստում` ընդամենը 100 շիշ գինի և որպես նվեր նվիրում հարյուր մարդու: Այդ գինին պատրաստված է ուրախությամբ և ես սրտանց նվերում եմ, որպեսզի կա՛մ Նոր տարվա սեղանին լինի, կա՛մ, առնվազն, Զատիկին բացվի և խմվի:
- Ըստ Ձեզ, ո՞րն էր 2014-ի քաղաքական ամենամեծ կորուստը և ձեռքբերումը:
- Ամենամեծ կորուստը ԵՏՄ-ին անդամակցելն էր. ամենամեծ ձեռքբերումը, ապագայում` որոշ փոփոխությունների հիմքերի ներդրումը, և հուսանք , որ 2015-ին կլինի իսկապես փոփոխությունների տարի: Եթե գլոբալ դիտարկեմ, ակնկալում եմ փոփոխություններ` ինչպես կառավարման ոլորտում, այնպես էլ` սերնդափոխության խնդիրների ելքի մասով , որ երկիրը սկսի ճիշտ զարգանալ:
- Ի՞նչ եք մաղթում հայ ժողովրդին և analitik.am-ի ընթերցողին:
- Առողջություն, բարեկեցություն, խաղաղություն: Դա, իմ կարծիքով, ամենակարևոր խնդիրն է այսօր. որ առաջին գծում կանգնած մեր զինվորները միշտ խաղաղ ծառայության մեջ լինեն: Ցանկանում եմ, որ մարդիկ երբևէ չհիասթափվեն, ամեն գնով սիրեն իրենց հայրենիքը և չհեռանան այստեղից : Հաշվի առնելով, որ 2015-ը կարևորագույն տարի է հայոց պատմության համար, Ցեղասպանության 100-ամյա տարելիցի հետ կապված, մաղթում եմ, որ մենք այնքան ուժեղ լինենք, որ կարողանանք այդ չարագործության արժանի պատասխանը տալ, ապացուցենք, որ ապրելու ենք, հարատևելու ենք և շատանալու ենք: Այդ առումով , հայ ազգի գենետիկ բալանսը պահելու համար, կմաղթեմ, որ ցանկացած հայ ընտանիքում գոնե մեկ բալիկ ծնվի :
Զրուցեց Հասմիկ Մովսիսյանը
