Ես համոզված եմ, որ իմ անձեռնմխելիության կոպիտ ոտնահարում է եղել և անձեռնմխելիության այն ձևակերպումը, որը տալիս է դատախազությունը շարքային կադասատրի աշխատողը չի տա: Երևան քաղաքի ընդհանուր իրավասության դատարանում հայտարարեց ՀՀ երկրորդ նախագահ Ռոբերտ Քոչարյանը:
Նիստին ներկա գլխավոր դատախազ Արթուր Դավթյանը տեղից ընդհատեց Քոչարյանին՝ հայտարարելով, թե կոռեկտության կոչ է անում. «Կոչ եմ անում դատավարության մասնակիցներին…»:
Քոչարյանը պահանջեց չընդհատել իրեն:
Դատավորն իր հերթին ասաց, որ հայտարարության իրավունքով է խոսում Գլխավոր դատախազը:
Երկրորդ նախագահը նշեց, թե դատախազը չի ասել, որ հայտարարության իրավունք է խնբդրում. «Թող խնդրի ու խոսի»:
Բանավեճին միջամտեց Քոչարյանի պաշտպաններից Հայկ Ալումյանը՝ հայտարարելով, թե անընդունելի է, որ դատախազությունը ընդհատում է. «Մենք որևէ մեկի խոսքը չենք ընդհատել և բռի ձևով միջամտել»:
«Չափի մեջ եղեք, պարոն Ալումյան»,-կոչ արեց դատավորը:
«Ես չափի մեջ եմ»,-արձագանքեց Ալումյանը:
«Ես կոչ եմ անում բոլոր կողմերին կոռեկտության մեջ լինել»,-հայտարարեց Գլխավոր դատախազը:
Սակայն Ալումյանը սկսեց ընդհատել՝ կոչ անելով դատարանին կարգը պահել, որպեսզի իրենք ստիպված չլինեն դա անել:
Դատավորի հարցին, որը լավ չլսվեց, Ալումյանը պատասխանեց «հա»-ով, ինչին դատավորն ասաց՝ «հա ու ջան, դե նստեք»:
«Յա էտ արդեն ժողովրդականին անցա՞ք»,-հայտարարեց Ալումյանը:
Ի վերջո Գլխավոր դատախազը խոսեց՝ կոչ անելով բոլորին լինել իրավական դաշտում, ոչ թե զգացմունքային:
«Ձեր մեղադրականն իրավական դաշտի հետ կապ չունի: Ինչ ուզեմ, նա էլ ասելու եմ, և նստած լսելու ես»,-ասաց Քոչարյանը:
«Փորձեք»,-արձագանքեց Դավթյանը:
«Գործի վերաբերյալ ինչ ուզեմ ասելու եմ, կարո՞ղ ա պաշտպանվելու իրավունքից էլ զրկեք»,-ասաց Քոչարյանը:
Պաշտպան Ալումյան առաջարկեց թույլ տալ կողմերին ավարտել խոսքը, որից հետո մյուս կողմը կարող է խոսել. «Ես գտնում եմ, որ Դուք՝ պարոն դատավոր, խախտում եք մեր իրավունքը յուրաքանչյուր դեպքում, երբ թույլ եք տալիս մյուս կողմին ընդհատել մեզ և հանդես գալ հայտարարությամբ: Եթե սա է Ձեր կարգը, ուրեմն մենք էլ կարող ենք մյուս կողմի խոսելու ժամանակ ընդհատել և հանդես գալ հայտարարությամբ: Եթե դատախազությունն է խոսում, Դուք կաշկանդված եք լինում: Եթե դատախազությունն ուզում է ինչ-որ բան ասել, խնդրում եմ Ձեզ թույլ տալ մեզ ասել մեր ասելիքը հետո նրանց խոսք տալ»:
