-Դուք միշտ էլ աչքի եք ընկել Ձեր յուրահատկությամբ, ո՞րն է Ձեր ինքնատիպ լինելու գաղտնիքը:
Իմ կարծիքով իմ խարիզման ու իմ մեջ եղած անվերջ էներգիայի պատճառով է, որ տարբերվում եմ մնացածից: Մանկությունից աչքի էի ընկնում թե՛ իմ պահվածքով, թե՛ հագուստի ոճով: Ես սիրում եմ միշտ լինել յուրօրինակ և տարբերվել:
- Ինչպե՞ս եք գնահատում հայաստանյան շոու–բիզնեսի ներկայիս մակարդակը:
Ես գտնում եմ, որ Հայաստանում չկա շոու-բիզնես, որ մի հատ էլ մակարդակ ունենա: Կան սիրված արտիստներ, երգեր, բայց երգիչները փող կարողանում են վաստակել միայն արտերկրում կամ էլ ծանոթի միջոցով: Տեսահոլովակների, հարցազրույցների, ֆոտոշարքերի, CD-ների միջոցով արտիստը գումար չի աշխատում:
-Մոտ ժամանակներում կա՞ն անակնկալներ Ձեր երկրպագուների համար :
Իհարկե՛, ես իմ երկրպագուների համար միշտ էլ անակնկալներ ունեմ: Մարտ ամսին պատրաստ կլինի իմ բոլոր աշխատանքներից տարբերվող "PASSION" երգի հիման վրա նկարահանված նոր տեսահոլովակը: Վերջերս նաև նոր կրիմինալ-կոմեդիա գեղարվեստական ֆիլմի գլխավոր դերերից մեկում եմ նկարահանվել: Ֆիլմի ռեժիսորն է Էդուարդ Շահնազարյանը, ֆիլմը կցուցադրվի մարտ ամսին: Կլինեն նաև շատ անակնկալներ, որոնց մասին դեռ չեմ ուզում խոսել:
-Կպատմե՞ք Ձեր նոր տեսահոլովակի մասին:
Ինչպես արդեն ասացի, տեսահոլովակը տարբերվում է իմ նախորդ աշխատանքներից իր յուրահատկությամբ: Գործիքավորումը՝ Արսեն Բարսամյանի, երաժշտությունն իմն է, իսկ խոսքերի հեղինակը Անինան է, ում հետ ես աշխատում եմ արդեն մի քանի տարի: Տեսահոլովակի գլխավոր դերում նկարահանվել է Թինա Քեյը: Կարծում եմ, որ իմ երկրպագուներին շատ դուր կգա:
-Ձեր կյանքում կայացրած ամենակարևոր որոշումը:
Նախ ասեմ, որ ես շատ զգայուն մարդ եմ և ունեմ շատ լավ ինտուիցիա: Շատ հաճախ եմ կարևոր հարցերի շուրջ կարևոր որոշումներ կայացնում և համարյա չեմ սխալվում: Կարևոր որոշումն իմ կյանքում՝ կարծում եմ Մոսկվայից Երևան գալն էր: Բայց դա ճիշտ որոշում էր:
-Ինչպիսի՞ն է երգչուհի Ջուսը որպես կին:
Երգչուհի Ջուսն առօրյա Ջուսից շատ է տարբերվում: Ես բեմում խենթ, բաց ու ոչ իրական կյանքով ապրող էակ եմ: Առօրյայում ես շատ կանացի, փափուկ, զգայուն հանգիստ ու լուրջ անձնավորություն եմ: Շատերն են իրական Ջուսին շփոթում Ջուսի բեմական կերպարի հետ:
-Ի՞նչ եք կարծում, արդյոք Հայաստանում հայ կնոջ իրավունքները պաշտպանվում են:
Հայաստանում բնակվող կինը պետք է լինի ուժեղ և իր վարքով արժանի լինի հարգանքի: Կարծում եմ՝ լավ ծանոթի միջոցով լավ կնոջ իրավունքները կարող են շատ լավ պաշտպանվել այստեղ:
-Ինչպես գիտենք, Դուք նկարահանվում եք ֆիլմում, մի փոքր կպատմե՞ք այդ մասին:
Մինչև ֆիլմի պրեմիերան ես չեմ կարող որևիցե բան ասել: Միայն կարող եմ ասել, որ շատ յուրահատուկ ու հետաքրքիր ֆիլմ է ստացվել: Շատերի համար իմ դերը անսպասելի կլինի: