Բարգավաճ Հայաստան» կուսակցության կազմակերպած ոչ իշխանական քաղաքական, հասարակական ուժերի խորհրդաժողովի ժամանակ ԲՀԿ կուսակցության նախագահ Գագիկ Ծառուկյանի ելույթի վերաբերյալ analitik.am-ի հետ զրույցում կարծիքներ հայտնեցին Հանրային խորհրդի անդամ Արշակ Սադոյանը, «Ազգային համաձայնություն» կուսակցության նախագահ Արամ Հարությունյանը և «Ժառանգություն» կուսակցության փոխնախագահ Արմեն Մարտիրոսյանը:
Արշակ Սադոյան. «Գագիկ Ծառուկյանը ծրագրել է Հայաստանում թողնել երկու քաղաքական ուժ՝ մնացածին կուլ տալ: Այդ ծրագրի շրջանակներում նախատեսված է, որ այդ ուժերից մեկը լինի ԲՀԿ-ն, մյուսը ՀՀԿ-ն: ԲՀԿ-ն իր ֆունկցիաները հետևողականորեն կատարում է, սակայն ինձ համար շատ անհասկանալի է, թե ինչու են նրա ծրագրերին կուլ գնացել ՀԱԿ-ը, չնայած նրա այս ծրագիրը ժամանակին հասկացել էր ՀՅԴ-ն և հետ կանգնեց: Սպասում եմ, որ մոտ ժամանակներս «Ժառանգությունն» էլ մի կողմ կքաշվի և այդ պայմաններում, նամանավանդ Ծառուկյանը` ինքն է հայտարարում, որ ինքն ընդդիմություն չէ, այլ այլընտրանք է: Այս պայմաններում, ընդամենը, այլընտրանքային կուսակցության խնդիրն է սրվում: Առավել ևս վատ եմ զգում մեր քաղաքական դաշտի կառուցվածքի տեսանկյունից. այսպիսի հավաքների, միջոցառումների ժամանակ հայտարարություններ անելուց ինչու՞ օրինակ ԲՀԿ-ն հստակ չի պահանջում, արպեսզի Գյումրու ողբերգության գործով զբաղվի ոչ թե Մոսկվան, այլ Հայաստանը. Մոսկվան հնարավորություն տա, որպեսզի քննությունը հայ իրավապահներն անցկացնեն: Իմ կարծիքով, սա ընդամենը իմիտացիա է: Այդ խորհրդաժողովը նախօրոք մշակված ծրագրով փոխհամաձայնեցված միջոցառում էր երկու քաղաքական ուժերի միջև՝ ԲՀԿ-ի և ՀՀԿ-ի: Ընթացքում հնչեցված ելույթներն ու հայտարարությունները զուտ գեղեցկության համար էր արված»:
Արամ Հարությունյան. «Երեկ կայացած խորհրդաժողովն աննախադեպ էր Հայաստանի քաղաքական պատմության մեջ: Ծառուկյանին հաջողվել էր ի մի բերել, իրար կողք նստեցնել հայաստանյան քաղաքական ուժերին, իհարկե, բացի իշխող ուժից: Խոսքն այն ուժերի մասին է, որոնք միևնույն մոտեցումն ունեն, բայց նախընտրում են համագործակցությունը եռյակի շրջանակներում: Ամբողջ խորհրդաժողովի ընթացքում կարմիր թելի պես անցնում էր իշխանափոխության ուրվականը: Ելույթ ունեցողները ելքը դրա մեջ էին տեսնում: Ծրագրային էր Գագիկ Ծառուկյանի ելույթը, նա խոսեց ամեն ինչի մասին»:
Արմեն Մարտիրոսյան. «Գագիկ Ծառուկյանի ելույթի համաձայն մենք հետագայում գործողություններ կիրականացնենք. կլինի առաջնորդների հանդիպում, հետագա ռազմավարության, քայլերի մասին միասնական որոշում կընդունվի և կգնանք առավել ակտիվ պայքարի»:
Հասմիկ Մովսիսյան
