Երևան քաղաքում նախատեսվում է կառուցել «Բարեկամության այգի», որի նպատակն է արժևորել հայ-ռուսական բարեկամությունը:
www.analitik.am-ը զրուցեց նախագծի ղեկավար, ռուս հայտնի քանդակագործ Կոնստանտին Զինիչի հետ:
Ստորև ներկայացնում ենք հարցազրույցը.
- Պատմեք մի փոքր «Բարեկամության այգի» նախագծի մասին:
-«Բարեկամության այգին» հայ և ռուս ժողովրդի բարեկամության ողջ պատմությունն իր մեջ ընդգրկող և խորհրդանշող ճարտարապետական կոմպոզիցիա է լինելու, և մենք ամեն ինչ անելու ենք, որպեսզի այս կոմպոզիցիայի մեջ ներառենք երկու երկրների ազգային, կրոնական, պատմական գծերը: «Բարեկամության այգու» միջոցով նպատակ ունենք մեր նոր սերունդներին ծանոթացնել հայ-ռուսական պատմությանը և հիշեցնել մեր ժողովուրդների դարավոր բարեկամության մասին: Բոլորս էլ գիտենք, թե Ռուսաստանում ինչքան հայեր են ապրում, և նրանք պետք է վստահ լինեն, որ մենք բարեկամ ժողովուրդներ ենք և միշտ պատրաստ ենք միմյանց օգնել: Համագործակցում ենք նաև Երևանի գլխավոր ճարտարապետի հետ և ուզում ենք համագործակցելու հրավիրել նաև տեղի ճարտարապետներին: Մենք պետք է համագործակցենք այս ոլորտի տարբեր մասնագետների հետ, որպեսզի «Բարեկամության այգին» լինի կատարյալ, յուրահատուկ և գեղեցիկ: Ամեն ինչ պետք է անենք, որպեսզի կառույցի տեսքի կոնֆորտային համապատասխանություն լինի՝ շինարարության համար օգտագործված քարերի, երկաթի, նկարազարդումների, դիզայնի համապատասխանություն:
-Ե՞րբ եք նախատեսում այս նախագիծն ավարտել և սկսել շինարարական աշխատանքները:
-Նախագիծը գրեթե պատրաստ է, նախատեսել ենք Դավիթաշենի հրապարակներից մեկում կառուցել: Այժմ խորհրդակցում ենք, ուզում ենք մինչև ամառ պատրաստել նախագծի վերջնական տարբերակը:
-Իսկ Ինչպե՞ս է ֆինանսավորվելու:
- Ֆինանսավորման հարցում ունենք պետական աջակցություն, սփյուռքը նույնպես ցանկանում է՝ Անգլիա, Ֆրանսիա, Ամերիկա և այլն:
Հնարավոր է, որ հետագայում «Բարեկամության այգու» այսպես ասած կրկնօրինակը կառուցվի նաև ՌԴ-ում:
Այո, իհարկե, կարծում եմ Հայաստանում նախագիծն ավարտելուց հետո, մենք կարող ենք նաև մտածել ՌԴ-ում նմանօրինակը կառուցելու մասին, ինչո՞ւ ոչ: Այս նախագծի նպատակն է ամրագրել երկու երկրների միջև դարեր շարունակ գոյություն ունեցող բարեկամությունն ինչպես Հայաստանում, այնպես էլ հետագայում ՌԴ-ում: