Analitik.am կայքը սկսում է «Կայացած կանայք» հարցազրույցների շարք, որի նպատակն է ներկայացնել մեր հասարակության մեջ ակտիվ գործունեություն ծավալող կանանց, ովքեր կարողացել են մեծ հաջողությունների հասնել՝ հաղթահարելով բոլոր խոչընդոտները: Հարցազրույցների ընթացքում կներկայացվեն կայացած կանանց անցած ուղին, դժվարություննների հաղթահարման մեխանիզմները, որոնք կարող են օգտակար լինել երիտասարդ կանանց, ովքեր նոր են սկսում իրենց կարիերան:
Ներկայացնում ենք հարցազրույց ՀՀ ԱԺ պատգամավոր, կայացած կին Կարինե Աճեմյանի հետ:
- Աշակերտական նստարանին ո՞ր մասնագիտությունն էր Ձեզ ավելի շատ գրավում:
- Դաշնակահարի:
-Դուք սովորել եք Երևանի պետական գեղարվեստաթատերական ինստիտուտի Հր. Ղափլանյանի դերասանական կուրսում և այնուհետև Հայ-բրիտանական բիզնես-դպրոցում` ստանալով գործարար-մենեջերի որակավորում: Ի՞նչ տվեցին ձեզ այս մասնագիտություններն ու արդյոք օգնում են Ձեր այժմյան աշխատանքում:
-Համոզված եմ, որ հիմնավոր և շատ լավ կրթություն եմ ստացել, որը չափազանց կարևոր է հատկապես պատգամավորի աշխատանքում:
-Մի փոքր կպատմե՞ք Ձեր աշխատանքային կենսագրության մասին, մինչև պատգամավոր դառնալը:
-Բնույթով տարբեր կազմակերպություններում եմ աշխատել, թատրոնի տնօրեն եմ եղել, բանկում աշխատակազմի ղեկավար, իսկ աշխատանքային գործունեությունս սկսել եմ երաժշտական դպրոցում` որպես ուսուցչուհի:
-ԱԺ պատգամավոր դառնալը Ձեր նպատակներում եղե՞լ է, թե ինքնաբերաբար է ստացվել:
-Երբեք չեմ հասկացել մարդկանց, ում համար պատգամավոր դառնալը գերխնդիր է ու ինքնահաստատման միջոց: Ինքս տարիներ շարունակ կուսակցական ակտիվ աշխատանքով եմ զբաղվել, որն էլ ինձ բերել է Ազգային ժողով:
-Ձեր կյանքի ճանապարհին հանդիպած արգելքները հաղթահարելու գաղտնիքը ո՞րն է:
Նպատակասլացությունը, աշխատասիրությունը, պատասխանատվության զգացումը և որ շատ կարևոր է` չափի զգացողությունը:
-Քաղաքական կին գործիչներից ո՞վ է Ձեր իդեալը:
-Իդեալներ երբեք չեմ ունեցել, բայց միշտ հիացել եմ խելացի ու իմաստուն կանանցով: Նրանք կարող են նպաստել իրենց երկրների առաջընթացին և դրական զարգացումներ ապահովել:
-Կայացած կնոջ համար ամենամեծ մարտահրավերը ո՞րն է:
-Իսկապես կայացած լինելը օգնում է դրանք հաղթահարել:
-Ընտանիք-Ազգային Ժողով, ինչպե՞ս եք համատեղում:
-Հաճույքով:
-Ո՞րն է եղել Ձեր կյանքում կայացրած ամենապատասխանատու որոշումը:
-Ամուսնությունս:
- Ձեզ համարու՞մ եք երջանիկ կին:
-Այո: Ես ունեմ սիրելի ընտանիք և աշխատանք, երկուսով էլ հպարտանում եմ:
-ԱԺ պատգամավորների մեծամասնությունը տղամարդիկ են, Ձեր կին լինելը չի՞ խանգարում աշխատանքային լիազորություններն իրականացնելուն և աշխատանքի ընթացքում արդյոք հանդիպում եք խտրականության՝ կին պատգամավորների նկատմամբ:
-Ոչ: Հիմնականում տղամարդկանց միջավայրում եմ աշխատել, և երբևէ լուրջ անհարմարություններ չեմ զգացել:
-Ի՞նչ խորհուրդ կտաք հայ կանանց, ովքեր ուզում են հաջող կարիերա ունենալ:
-Հաջող ամուսնությունը օգնում է կայանալուն:
Նախորդ հարցազրույցը կարող եք կարդալ այստեղ
Վարդուհի Երանոսյան