2014 թվականը Պաշտպանության բանակի, ԼՂՀ-ի համար լարված տարի էր և այդ լարված տարին առանձնացավ տարբեր տիպի դիվերսիոն-հետախուզական գործողություններով և այդ իրականության մեջ պաշտպանության բանակի ղեկավարության և զորամասերի խնդիրը ոչ միայն պաշտպանական խնդիրներ իրականացնելն էր, այլ նաև կանխարգելիչ միջոցառումներ իրականացնելը, որը շատ դեպքերում իրականացվում է մեր տարածքից դուրս:
Այսօր Մարդու իրավունքների պաշտպանության միջազգային օրվան նվիրված միջոցառումից հետո լրագրողների հետ հանդիպման ժամանակ ասաց ՀՀ պաշտպանության նախարար Սեյրան Օհանյանը:
Հարցին, թե այսօր ի՞նչ վիճակ է սահմանում, լարվածություն կա՞, Սեյրան Օհանյանը պատասխանեց. «Այսօր լարվածությունը մեկ բարձրանում է, մեկ` իջնում: Նախկինում եթե Պաշտպանության բանակի հատվածում նվազագույնը լինում էին կրակոցների 35-50 դրվագներ, և հակառակորդն օգտագործում էր 1000 փամփուշտ, այսօր այդ կրակոցների թիվը հասնում է 170-ի, 200-ի և փամփուշտների թիվը 3000-ից մինչև 6000-ի է հասնում:Պաշտպանության բանակի ստորաբաժանումները և հայկական զինված ուժերի ստորաբաժանումները միայն պատասխանում են դիպուկահարների կանոնավոր կրակոցներին, անկանոն կրակոցներին մենք հանգիստ ենք վերաբերվում և չենք պատասխանում: Իսկ եթե լինում են սադրանքներ, ապա մենք ձգտում ենք միայն չպաշտպանվել, այլ կանխել»:
Դիտարկմանը, թե պե՞տք չէ, երբեմն, նախահարձակ լինել, Սեյրան Օհանյանն արձագանքեց.«Մենք ավելի շատ կողմնակից ենք կանխարգելիչ գործողությունների, պաշտպանական միջոցառումների, մենք ինքներս չենք խախտում, սակայն, երբ որ խախտում են մեր հարևանները, ապա այդ խախտմանը պետք է արժանի պատասխան տալ և իրենց «եռանդը» մարում է, երբ իրենք արժանի պատասխան ենք տալիս»:
Անդրադառնալով ԵԱՀԿ Մինսկի խմբի բանակցային գործընթացին, նախարարն ասաց, որ այն ընթանում է իր հունով. «Պայմանավորվածությունները քաղաքական մակարդակում իրականացվում են, պարզապես այս լարվածությունները տեղի են ունենում տարբեր գործընթացների, հատկապես հանդիպումների շրջանակում, և փորձ է արվում այս լարվածությամբ ազդել հայկական կողմի վրա: Ե՛վ արցախյան գոյապայքարի փորձը, և՛ այսօրվա փորձը ցույց է տալիս, որ արդեն իսկ այն նպատակները, որ մեր հարևանների մոտ կար՝ սպառազինությունների մրցավազքով ցույց տալ իրենց բանակի հզորությունը, որն ի չիք դարձավ 2014 թվականի ոտնձգությունների ժամանակ, այլևս չի ազդում հայկական կողմի վրա: Մենք մեր տեսակետների տերն ենք. հարցը պետք է լուծվի քաղաքական ճանապարհով, խաղաղ պայմաններում՝ իհարկե՛, պաշտպանելով բոլոր միջազգային նորմերը»:
Ինչ վերաբերում է նոյեմբերի 12-ին ադրբեջանցիների կողմից խոցված ուղղաթիռի վերաբերյալ նշանակված քննությանը, ապա սրա վերաբերյալ նախարարը նշեց, թե հետաքննությունն ընթանում է և այժմ որևէ նորություն չի կարող ասել:
Հարցին, թե օրվա խորհրդին համահունչ, որքանո՞վ են պաշտպանված հայ զինվորի իրավունքները, Սերյան Օհանյանը պատասխանեց. «Մարդու իրավունքների պաշտպանության խնդիրները զինված ուժերում օրըստօրե բարձր հիմքերի վրա են դրվում` շնորհիվ զինված ուժերի ղեկավարության, մարդու իրավունքների պաշտպանի հետ համագործակցության, վերահսկողական մեխանիզմների ձևավորման ջանքերի»:
Նախարարի խոսքով՝ հատկապես պաշտպանության ոլորտում ժամանակակից իրականության մեջ երկու գործոններ կան, որոնք բերում են հաջողություններ. դա մարդն է և զենքը:
«Դա նշանակում է, որ Հայաստանի զինված ուժերում որդեգրված մարդակենտրոն գործունեությունը ամենաճիշտ ուղղություն է, և մենք զինվորին տեսնում ենք ո՛չ թե որպես ռեսուրս, այլ կոնկրետ գործոն, որը պետք է զինված ուժերում զարգանա՝ հենվելով իր պարտականությունների, պատասխանատվության, իր ունեցած իրավունքների վրա նաև վերադաստիարակվի և արժանի ՀՀ քաղաքացի վերադառնա մեր հասարակություն»,-ասաց նախարարը։
Սեյրան Օհանյանի խոսքով՝ այդ առումով բավականին լուրջ ծրագրեր են իրականացվում և՛ ՊՆ–ի, և՛ ՄԻՊ-ի, և՛ ԵԱՀԿ Մինսկի երևանյան գրասենյակի կողմից հապատասխան ծրագրերով: «Այսինքն` զինծառայողները ստանում են համապատասխան գիտելիքներ` խորհրդակցությունների, պարապմունքների միջոցով, նրանք ունեն իրենց ձեռքի տակ բոլոր այն իրավունքները, որից պետք է օգտվեն, կա բողոքարկման մեխանիզմ և հասարակական ոլորտում կան թեժ գծեր»,– ասաց նա:
