Իր ներկացմամբ ԲՀԿ անդամ, սակայն ԲՀԿ ղեկավարոււթյան պնդմամբ կուսակցությունից հեռացված Գևորգ Պետրոսյանը շարունակում է «Բարգավաճ Հայաստան» կուսակցության նախագահ Նաիրա Զոհրաբյանին մեղադրել կուսակցությունը քանդելու մեջ: Ի՞նչ է եղել այս անգամ և ինչո՞ւմ է պարոն Պետրոսյանը մեղադրում Զոհրաբյանին:
-Պարոն Պետրոսյան, Դուք Ձեր ֆեյսբուքյան գրառումների միջոցով շարունակում եք ԲՀԿ նախագահ Նաիրա Զոհրաբյանին մեղադրել կուսացությունը քանդելու մեջ: Այս անգամ Դուք, անդրադառնալով ԸՕ-ի քննարկումների ժամանակ տիկին Զոհրաբյանի ելույթին, գրել եք, որ քանի դեռ նա կուսակցության նախագահն է, այդ կուսակցության մասնակցությունը տարբեր քննարկումներին ինքնանպատակ է լինելու: Ինչո՞ւ եք այդպես կարծում:
-Անկեղծ ասած, հիմա Նաիրա Զոհրաբյանի գործունեությանն անդրադառնալն ինձանից մեծ ջանքեր է պահանջում, քանի որ ես այս օրերին ավելի կարևոր գործեր ունեմ անելու: Սակայն, հաշվի առնելով այն, որ նրա գործունեությունը կապ ունի հասարակության խնդիրների հետ, ես կխոսեմ այդ մասին: Ես «ինքնանպատակ» բառն օգտագործել եմ, որովհետև հենց նա իր ելույթում հայտարարեց, որ միևնույն է որևէ բան չի փոխվելու, քանի որ չկա քաղաքական կամք: Այսինքն՝ նա չի հավատում այն արդյունքին, որի համար մասնակցում է քննարկումներին: Հետևաբար, հարց է առաջանում, թե որն է դրանց մասնակցելու իմաստը: Իսկ եթե դու ընդդիմադիր դաշտում ես գործում ու վստահ ես, որ իշխանությունները ցանկացած դեպքում անելու են իրենց ուզածը, ընդունի հստակ ընդդիմադիր կեցվածք, այլ ոչ թե կանգնի ու ասա, որ ձևական ես մասնակցում:
Իմ գրառման երկրորդ մասը վերաբերում է Զոհրաբյանի ելույթի այն հատվածին, որը վերաբերում է խոսքի իրավունքին: Այստեղ ես միայն մի բան կասեմ՝ նա որոշեց ինձ կուսակցությունից հեռացնել, երբ ես՝ որպես քաղաքացի և կուսակցական, քննադատեցի իր գործելաոճը:
Իսկ երրորդ մեղադրանքս վերաբերում է ընտրությունների մասով նրա խոսքերին: Զոհրաբյանը հայտարարեց, որ բոլորս սպառել ենք անարդար ընտրություններ անցկացնելու հնարավորությունները: Այսինքն՝ նա ընդունում է, որ ինչ-որ մարդկանց հետ մասնակցել է անարդար ընտրություններ անցկացնելու գործին: Ես չեմ հասկանում՝ բարոյականությունն ո՞ւր մնաց: Նա մի կողմից խոստովանում է, որ մասնակցել է անարդար ընտրություններ անցկացնելուն, իսկ մյուս կողմից արդար ընտրությունների կոչ է անում: Ես չգիտեմ, թե ովքեր են նրա հետ եղել կեղծիքներ անելիս, բայց այդ կուսակցությունում եղել են և կան իսկապես ազնիվ մարդիկ, ովքեր արդար կերպով են մասնակցել ընտրություններին: Զոհրաբյանը, մի ամբողջ կուսակցության անունից խոսելով, ասում է, որ սպառել են անարդար ընտրություններ անցկացնելու հնարավորությունները: Այսքանից հետո ինչպե՞ս կարող ենք չասել, որ նա քանդում է կուսակցությունը:
-Դուք գրել եք, որ Ձեզ հեռացրեցին կուսակցությունից: Կարելի՞ է ենթադրել, որ այս հարցը փակված է:
-Ոչ, նա ապօրինաբար է դա արել: Որոշումը կայացվել է Նաիրա Զոհրաբյանի պարտադրանքով և ցուցումով: Ես արդեն առիթ ունեցել եմ ասելու, որ կուսակցականին հեռացնելու որոշումը կարող է կայացվել միայն քաղաքական խորհրդի միջոցով, ինչը տեղի չի ունեցել: Զոհրաբյանը քաղաքական խորհուրդ հրավիրելու հնարավորություն չունի, այդքան հնարավորություն չունի: Դրա համար էլ գնացել է Ավանի տարածքային կառույց, բռնացել մարդկանց վրա և ստիպել ինձ հեռացնել: Ուղղակի ես հիմա այս հարցով չեմ զբաղվում, քանի որ երկրի վիճակը կայուն չէ, սահմանին մենք զոհեր ենք ունենում, իմ տղան էլ է կանգնած դիրքերում, և ես բարոյական չեմ համարում իմ անձնական խնդիրների մասին բարձրաձայնել: Բայց իրավիճակը հանդրատվելուց հետո, ես անպայման դիմելու եմ դատարան, նա չի մարսելու այս անօրինականությունը: Ուրիշներին մեղադրում է անբարոյականության, խախտումների, կեղծիքների մեջ, բայց հենց ինքն է այդ հարցում համար առաջինը:
-Այսինքն Դուք դեռ ԲՀԿ անդա՞մ եք:
-Այո, իհարկե... Ես հիմա կարող եմ իմ կամքով հեռանալ կուսակցությունից, բայց դա չեմ անելու, դիմելու եմ դատարան, որպեսզի նա խայտառակ լինի իր անօրինական գործունեության համար:
-Դուք Զոհրաբյանին մեղադրում եք կուսակցությունը քանդելու մեջ, այդ դեպքում ի՞նչ եք կարծում, մյուսները չեն տեսնո՞ւմ դա, ինչո՞ւ քայլեր չեն ձեռնարկում:
-Ես ինձ թույլ չեմ տա ուրիշի փոխարեն պատասխանել: Ամեն մարդ տարբեր չափանիշներով ու սկզբունքներով է ղեկավարվում, տարբեր գործելաոճ ունի: Ես բացահայտ եմ գործում, սովորությանս համաձայն և դրական, և բացասական կարծիքս արտահայտում եմ հրապարակայնորեն: Ամեն դեպքում կարող եմ ասել, որ կուսակցությունում նրա գործունեությունը քչերին է գոհացնում: Հնարավոր է՝ ոմանց համար դա շահեկան է, սակայն դա դուրեկան չի լինել չի կարող:
Ես ևս մի բանի մասին եմ ցանկանում խոսել: Նաիրա Զոհրաբյանը հայտարարում է, թե ինձ ու իմ գործունեությանն անդրադառնալն իր հետաքրքրությունների շրջանակներում չէ: Եթե անկեղծ, ես շատ եկեղեցիներում եմ մոմ վառել դրա համար, բայց նա իր ֆեյսբուքյան օգտատերերի միջոցով շարունակում է տարածել իմ մարզահագուստով լուսանկարները և ինչ-որ բացասական երանգով ներկայացնել դա: Եթե մի պահ խիղճս կորցնեմ և նրա նման վարվեմ հետևյալ հարցը կուղղեմ վերջինիս՝ ինչպե՞ս եք Դուք կարողանում, առանց ամաչելու, կարմիր թափանցիկ հագուստով գնալ ԱԺ և պաթոսով ելույթ ունենալ մեր ժողովրդի ողբերգական վիճակի, արտաքին և ներքին խնդիրների մասին: Այդ տեսքով կարելի է գնալ հեռու բարեկամի տանը մնացած աղջկա հարսանիքին և մի լավ ուրախանալ, բայց ոչ խորհրդարանում ելույթ ունենալ:
