գլխավոր Իրավական Հարցազրույց 

«Ռեստարտ» նախաձեռնության անդամները հավանական է, որ ստանան ազատազրկման ձևով պատիժ. Տիգրան Աթանեսյանը՝ քրգործի զարգացումների մասին

Այսօր պարզ դարձավ, որ Նարեկ Մալյանի գործով «Ռեստարտ» նախաձեռնության ևս 4 անդամի մեղադրանք է առաջադրվել:

«Ռեստարտ» նախաձեռնության անդամներ Արամայիս Պետրոսյանին, Գարիկ Միսկարյանին, Յուրի Ավագյանին, Հրաչյա Խլղաթյանին մեղադրանք է առաջադրվել՝ ՀՀ ՔՕ-ի 34-131 հոդվածի 2-րդ մասի 1-ին կետի հատկանիշներով՝ մի խումբ անձանց կողմից նախնական համաձայնությամբ առևանգման փորձ կատարելու հատկանիշներով»,- այս մասին Tert.am- ի հետ զրույցում ասել էր դատախազության հանրային կապերի բաժնի պետ Արևիկ Խաչատրյանը:

Analitik.am-ը զրուցեց Նարեկ Մալյանի փաստաբան Տիգրան Աթանեսյանի հետ՝ հասկանալու համար, թե ուրիշ ինչ զարգացումներ կան հարուցված քրեական գործի հետ կապված:

Պարոն Աթանեսյան, այսօր պարզ դարձավ, որ «Ռեստարտ» նախաձեռնության ևս 4 անդամի մեղադրանք է առաջադրվել՝ մի խումբ անձանց կողմից նախնական համաձայնությամբ առևանգման փորձ կատարելու հատկանիշներով հարուցված քրեական գործի շրջանակներում: Ի՞նչ կասեք առաջադրված մեղադրանքի մասով:

Առաջին օրվանից մենք՝ ես և Նարեկ Մալյանը, ասում էինք, որ տեղի է ունեցել առևանգում, սա խուլիգանություն չէ: Մեր մանրամասն ցուցմունքից հետո իրավապահ մարմինները ևս ընդունեցին այդ դիրքորոշումը: Քանի որ կողմը, որը գործել էր այս հանցագործությունը, ընդունում է իր արարքը և հայտարարել է, որ պատրաստ է պատիժ կրել օրենքով սահմանված կարգով, գտնում եմ, որ պետք է գնանք դատավարության հենց այս մեղադրանքով: Ես հուսով եմ, որ նրանք հույս չունեին, որ խոսքը վերաբերում է «կարմիր գծերի» 5000 դրամ տուգանքին, երբ ասվում է պատիժ: Այս դեպքում պատիժը 4-ից 8 տարի ազատազրկումն է, քանի որ առևանգման փորձ է, ապա 2/3 մաքսիմալից ավել պատիժ չեն կարող նշանակել: Քանի որ առևանգումը համարվում է ծանր հանցագործություն, այլ պատիժ, բացի ազատազրկումից, նախատեսված չէ: Հետևաբար, հավանական է, որ այդ անձինք ստանան ազատազարկման ձևով պատիժ:

Նախաքննության սկզբում ինչո՞ւ չէին առաջադրում  առևանգման փորձի մեղադրանք: Ի՞նչն էր պատճառը:

Որևէ մեղադրանք չի եղել: Հարուցումը եղել է խուլիգանության հոդվածով: Ես նորմալ եմ դա համարում, որովհետև, ի վերջո, տեղեկություն ունեին ոստիկանության զեկուցագրից: Ոստիկաններն են զեկուցել, և Նարեկը որևէ բացատրություն չէր տվել այդ ընթացքում: Զեկուցագրում եղել է, որ ինչ-որ անկարգություն է եղել, և մարդիկ միմյանց քաշքշել էին՝ թե ինչ էին ուզում անել, ինչ էին անում, բնականաբար, զեկուցագրերի մեջ  չէր կարող դա լինել: Ոստիկանները ինչ տեսել, այն էլ արձանագրել են: Չեմ կարծում, որ մեծ խախտում է այն, որ հարուցումը եղել է խուլիգանության հոդվածով: Սակայն, երբ որ դեպքի հանգամանքներն արդեն մեր կողմից ներկայացվեցին, այդ անձանց առաջադրվեց այս մեղադրանքը:

Այսինքն՝ նախաքննական մարմինի աշխատանքից, կարող ենք ասել, որ ամեն դեպքում գոհ ե՞ք, դժգոհ չե՞ք:

Դժվարանում եմ ասել գոհ եմ, թե դժգոհ: Հուսամ , որ մեղադրանքը ներկայացվել է հիմնավոր, հավաքվել են բոլոր ապացույցները և խնդիր չենք ունենա այդ մեղադրանքի հետ դատարանում, որովհետև կան դեպքի ականատեսներ: Ամեն դեպքում մարդիկ Ֆեյսբուքում հայտարարում են այդ մասին: Անգամ մեկ օգտատեր հայտարարել է, որ իր նկատմամբ ճնշման փորձ է եղել: Հուսով եմ, որ նախաքննական մարմինն այդ հանգամանքներն էլ կպարզի: Ինչպես նաև կպարզի բոլոր մասնակիցներին, այլ ոչ միայն նրանց, ովքեր անմիջապես բռնություն են գործադրել Նարեկի նկատմամբ, այլև այնտեղ եղած մարդկանց՝ նկարահանողներին, կպարզեն, թե դեպքն ինչպես է նախապատրաստվել, կազմակերպվել և իրականացվել: Այսինքն՝ երբ նախաքննության մարմինն այս ամբողջ ինֆորմացիան օրենքով սահմանված կարգով ձեռք կբերի, կամրագրի քրեական գործի նյութերում, նոր կարող ենք խոսել դրական կամ բացասական գնահատականի մասին:

Ի՞նչ եք կարծում՝ եղել՞ են նման արարքի պատվիրատուներ, կարո՞ղ ենք նման ենթադրություններ անել: Ինչ եք կարծում՝ իրենց հնարավոր  պատվիրատուներին բացահայտելու ուղղությամբ ինչ-որ բան կանի՞  նախաքննական մարմինը, թե՝ ոչ:

Նման տվյալ մենք չունենք, որ բացի այդ անձանցից կան ինչ-որ այլ պատվիրատուներ: Չենք կարող բացառել՝ որպես վարկած: Հուսով եմ, որ նախաքննական մարմինը կփորձի նաև այդպիսի վարկած փնտրել:

Ինչպես գիտենք, մեղադրյալներից որևէ մեկի նկատմամբ կալանքը որպես խափանման միջոց չի ընտրվել, ի՞նչ կասեք այս մասով, Դուք ճիշտ համարո՞ւմ եք, որ բացի կալանքից այլ խափանման միջոց է ընտրվել:

Մենք՝ փաստաբաններով, մի  դիրքորոշում ենք ունեցել և վստահ եմ, որ Նարեկն էլ այս հարցում նույն դիրքորոշումը կունենա, որ կալանավորումն անհրաժեշտ է ոչ թե այն դեպքում, երբ հոդվածն է խիստ, այլ՝ որպեսզի ապահովի անձանց պատշաճ վարքագիծը: Եթե հիմնավորվի, որ կան ականատեսներ, որոնց վրա ներգործության փորձ է եղել կամ լինի նման փորձ, ապա այդ անձինք պետք է ունենան ավելի խիստ խափանման միջոցներ: Մենք պատերազմ չենք հայտարարելու նախաքննական մարմնին՝ կալանավորել-չկալանավորելու հարցում, բայց դատարանից պահանջելու ենք իրական փաստացի ազատազրկում:

Այս գործի մասով հնարավո՞ր է քաղաքական ազդեցություններ կամ իշխանության կողմից միջնորդություններ, որ ավելի մեղմ վերաբերեն, օրինակ, ի՞նչ եք կարծում:

Այս պահին չեմ կարող նման պնդումներ անել: Որևէ իրական հիմք չունեմ: Ժամանակը ցույց կտա:

 

  • 133
  •  
  •  
  • 1
  •  
  • 1
  •  
  •  
  •  
    135
    Shares

Նույն շարքից