Ես խոսել եմ այն մասին, որ պարբերաբար ընդդիմությունը կամ նախկին իշխանությունը փորձել է տորպեդահարել՝ օգտագործելով և գործիքներ, և մարդկանց: Շատ մարդիկ տրվել են գայթակղությանը, հետևել են գաղափարներին, փորձել են քայլեր ձեռնարկել, սակայն արդյունքում որևէ հաջողություն չեն ունեցել: Այս մասին լրագրողների հետ զրույցում հայտարարեց ՀՀ ԱԽ քարտուղար Արմեն Գրիգորյանը՝ անդրադառնալով իր հայտարարությանը, թե Հայաստանում հեղաշրջման փորձ է եղել:
ԱԽ քարտուղարը հրաժարվեց անուններ հնչեցնել:
Ինչ վերաբերում է հարցին՝ կլինեն արդյո՞ք իրավական հետևանքներ, Գրիգորյանը նշեց, որ ընդհանրապես ինչ-որ մտքեր, գաղափարներ ունենալը դժվար է դատապարտել. «Գործողությունների մակարդակով… գործողություններն էլ այնպիսին են, որ երբեմն դրանք հստակ կապելը նպատակի և երազանքի մարդկանց հետ դժվարություններ է առաջանում: Սակայն կարող եմ ասել, որ դա կանխվել է, հիմա որևիցե վտանգ չկա»:
Հարցին, թե ինչ հետևանքներ են եղել կանխվելուց հետո, ԱԽ քարտուղարն ասաց, որ տարբեր հետևանքներ են եղել, նաև՝ պաշտոնանկություններ:
Քրեական գործեր կան արդյո՞ք: Գրիգորյանը նշեց, որ այս պահին քննություն է ընթանում, եթե անհրաժեշտություն լինի, կհարուցվեն:
Դիտարկմանը, որ վերջին շրջանում եղել են Ոստիկանապետի, ԱԱԾ տնօրենի, Պետական պահպանության ծառայության պետի պաշտոնանկություններ և հարցին՝ կարելի է ենթադրել, որ նրանք մարդիկ են, ովքեր կապ ունեն, կամ գոնե աչք են փակել, Գրիգորյանն ասաց, որ անունների մասով հստակություն չի մտցնի. «Ես կարող եմ ասել, որ առաջացել են նման խնդիրներ, նաև ողջամիտ կասկածներ են առաջացել, որ այդպիսի նպատակներ կան, ինչը կանխվել է: Դրա օգտագործման տարբեր ձևեր են եղել՝ սկսած ֆեյքնյուզից մինչև տարբեր ձևերով մեր քաղաքական թիմին սևացնելու փորձերը:
Փորձել են տարբեր քայլեր ձեռնարկել, ասել, որ պետական համակարգը չի աշխատելու, տնտեսությունը ձախողվելու է, որ հողեր ենք հանձնելու: Նույնիսկ հասել էր այն մակարդակին, որ ասում էին՝ Հայաստան սպառազինություն չի մտնում: Կուսակցության մակարդակով նման հայտարարություն է արվել: Սակայն 2019 թվականի արդյունքներն ամփոփելուց հետո պարզվեց, որ Հայաստանն աննախադեպ քանակի զենք է գնել: Ընդհանուր առմամբ կարող եմ ասել, որ քայլերը տարբեր են եղել, մենք կանխել ենք, հիմա վտանգ չկա»:
