Այսօր «Անալիտիկ» կենտրոնի հյուրն էր «Այլընտրանք» հետազոտական կենտրոնի ղեկավար, տնտեսական գիտությունների դոկտոր, պրոֆեսոր Թաթուլ Մանասերյանը:
Բանախոսը խոսելով Հայաստանի տնտեսության ներկա զարգացման մասին, նշեց. «Ներկայիս տնտեսական զարգացման մասին խոսելիս պետք է հաշվի առնել, որ այսօր առավել քան երբևէ, ներքին ու արտաքին ասպեկտները առավել ձևով են ներկայանում: Հայաստանը միանում է ԵՏՄ-ին և այս գործընթացը ոչ միանշանակ գնահատվող տարրեր է պարունակում իր մեջ, որը անդրադառնում է նաև մեր տնտեսության վրա՝ մանր ու մեծ բիզնեսի զարգացմանը, նոր շուկներ ձեռք բերելուն և այլն»:
Թաթուլ Մանասերյանը նաև նշեց, որ մեր երկիրը 2014 թվականը համեստ թվերով է եզրափակում. սպասվում է չորս տոկոս տնտեսական աճ, որը կապված է արտաքին ու ներքին գործոններով: Հարցին՝ ԵՏՄ-ին անդամակցելը ի՞նչ մարտահրավերն է նետում Հայաստանին, Մանասերյանը պատասխանեց. « Այդ մարտահրավերները տարբեր են, կապված նրանից, թե ինչքանով մենք անդամակցությանը պատրաստ կլինենք: Ավելի գլոբալ առումով մենք կարող ենք ունենալ երկու ծայրահեղ սցենարներ՝ կարող ենք աշխատատեղերի կորուստ ունենալ, սակայն սպառման շուկան, բոլոր ոլորտների հայ արտադրողների համար կբազմապատկվի: Սա շատ կարևոր ցուցանիշ է, և պետք է պատրաստ լինենք ու կարողանանք ճիշտ օգտագործել այս պահը: Հույս է առաջանում, որ մենաշնորհների դեմ պայքարն ավելի արդյունավետ կարող է լինել, մարտահրավերներ կարող են լինել էներգիակիրների ներկրման հետ կապված, քանի որ դրանց ներթափանցումը ավելի կդժվարանա»:
Բանախոսը նշեց նաև, որ Հայաստանը IT ոլորտում տարածաշրջանում մեծ մրցունակություն ունի: Այս ոլորտը արագ է զարգանում, որն էլ պետք է կարողանալ գրագետ օգտագործել երկրի տնտեսության զարգացման հարցում. «Պետք է զարգացնել առողջ մրցակցության դաշտ, չկա այսօր այն մոտիվը, որպեսզի հայ գործարարը մրցակցությունը զարգացնելու համար իր սարքավորումները կատարելագործի: Նշեմ, որ այսօր մեր երկրում, բանկային ոլորտը կայացած, զարգացած, համակարգ է, սակայն դրանք մեծ շահույթներ ապահովելով առաջ են գնում՝ պետությանը աջակցելու փոխարեն»:
Բանախոսը խոսելով «Շրջանառության հարկի» մասին, նշեց. «ԱԺ-ն ու կառավարությունը թերանում են հասարակությանը ճիշտ իրազեկելու հարցում: Որոշ քաղաքական գործիչներ էլ , չի բացառվում, որ փոքր ձեռնարկատերերին օգտագործում են ՝ շփոթ առաջացնելու համար: Յուրաքանչյուր շերտի հետ պետք է շփվել ու բացատրել այս խնդրի էությունը: Ցուցարարների մեջ գյուղացիներ կան, ովքեր ընդհանրապես կապ չունեն այս խնդրի հետ, սակայն փողոց են դուրս եկել: «Շրջանառության հարկը» շատ դրական կողմեր ունի, այն կարող է օգնել տնտեսությունը հաշվառելի դարձնելուն , փաստաթղթաշրջանառության կարգավորման խնդիրը կարող է որոշակի լուծում ստանալ: Հստակ քաղաքացիական դիրքորոշում ունենալով՝ պետք է ավելի գիտակից մոտենալ այս հարցին »:
