Այսօր «Անալիտիկ» կենտրոնում տեղի ունեցած ասուլիսի հյուրն էր տնտեսական գիտությունների թեկնածու, դոցենտ Վիլեն Խաչատրյանը:
Անդրադառնալով Արժույթի միջազգային հիմնադրամի նոր զեկույցին, բանախոսը նշեց. «Ըստ զեկույցի՝ ստեղծվել է ռիսկային իրավիճակ: Համաշխարհային տնտեսության զարգացման միտումները ընդհանուր առմամբ դանդաղել են: Ըստ զեկույցի ԱՄՆ տնտեսության աճը կարագանա, ԵՄ տարածքում նույնպես, ԱՊՀ տարածաշրջանում ունենք տնտեսության դանդաղ աճ, օրինակ՝ Ռուսաստանի տնտեսությունն ըստ այս զեկույցի մեկ տոկոս աճ չի կարող ապահովել»:
Խոսելով տոկոսադրույքների մասին, տնտեսագետը նշեց. « 2013-ի համեմատ աշխարհում վարկավորման համար կլինեն նպաստավոր պայմաններ»:
Հարցին՝ ի՞նչ է սպասվում ՀՀ տնտեսությանը 2014-ին, բանախոսը պատասխանեց, որ Հայաստանի տնտեսության աճը կկազմի 3, 2 տոկոս, մինչև տասնհինգը՝ 4,5 տոկոս: Ըստ կանխատեսումների՝ Հայաստանի տնտեսության աճը հինգ տոկոսը չի գերազանցի, որն էլ տնտեսության թույլ զարգացման տեմպ է.«Հայաստանի տնտեսության դանդաղ աճը մեկնաբանություն ունի՝ բացատրվում է Ռուսաստանի տնտեսության հետ մեծ կախվածություն ունենալով»:
Ըստ Վիլեն Խաչատրյանի՝ ամբողջ աշխարհում ոսկու պաշարն հասել է 12 տրիլիոն դոլարի, որը պայմանավորված է դոլարի դիրքերի թուլացմամբ:
Բանախոսը անդրադառնալով ներքաղաքական զարգացումներին, նշեց. «Ստորագրելով ԵՏՄ-ին անդամակցելու պայմանագիրը, Հայաստանը փոխեց իր տնտեսության զարգացման վեկտորը: ԵՏՄ-ին անդամակցելը ունի նաև դրական զարգացումներ՝ գործ ունենալով Ասիական տարածաշրջանի հետ, մենք գործ ունենք նաև այդ տարածաշրջանի երկրների ետ: Ասիական զարգացող երկրները նույնիսկ համաշխարհային ճգնաժամի ընթացքում տնտեսության անկում չեն ունենում : Ղազախստանը ամեն տարի տնտեսության յոթ տոկոս աճ է ապահովում, որն էլ դրական զարգացում կունենա գործընկերության տեսանկյունից: Որոշակի ռիսկերը, որոնք պայամնավորված էին կոնկրետ ներմուծման հետ, այժմ կարող են պակասել: Հայաստանը հայտնվելով մրցակցային դաշտում, ստիպված կլինի ոչ միայն ներմուծել, այլև արտադրել; Այսինքն՝ կրճատվելու է ներմուծումը և զարգանալու է տեղական արտադրությունը»:
Հարցին՝ ինչպե՞ս է Եվրոպան վերաբերում Հայաստանի՝ ԵՏՄ-ին անդամակցությանը, բանախոսը պատասխանեց. «Եվրոպայի մոտեցումը այս հարցին կզգանք մոտակա վեց ամսում, սակայն նման փոքր տնտեսություն ունեցող երկրի հանդեպ Եվրոպայի վերաբերմունքը շատ խիստ չի կարող լինել; Կարծում եմ, որ նույն Եվրոպական ղեկավար մարմիններում նույնպես Հայաստանի հետ չեն ցանկանում հարաբերությունները սրել»;
