«Հրազդանի շրջանում որոշ գյուղերի ցանքատարածքներ, դաշտեր ջրով ողողվելու պատճառով լուրջ վնասներ են կրել, քանի որ փչացել է գյուղացիների ողջ բերքը»,- այս մասին այսօր «Անալիտիկ» կենտրոնում տեղի ունեցած ասուլիսի ժամանակ լրագրողներին տեղեկացրեց բնապահպան Սիլվա Ադամյանը:
«Ահազանգ էինք ստացել և մեկնեցինք գյուղ և ուսումնասիրեցինք տարածքը, պարզեցինք, որ խնդիրը կապված է Սևանա լճից շատ ջուր բաց թողնելու հետ: Գյուղապետի տեղակալը պնդեց, որ ժամանակին գյուղացիներին զգուշացրել են, որպեսզի այս տարածքը գյուղատնտեսական նպատակնեով չօգտագործեն, քանի որ նմանատիպ դեպք էլի է տեղի ունեցել»,-նշեց բնապահպանը:
«Այս խնդիրը բավականին հրատապ է, քանի որ կապված է Սևանի ջրի քանակի հետ: Սևանից ջուր հիմնականում բաց է թողնվում էներգետիկ նպատակով՝ Սևան-Հրազադան կասկադ, գյուղատնտեսական նպատակների համար՝ ոռոգման նպատակով և արդյունաբերական նպատակով՝ ջրի վրա կառուցված են բազմաթիվ ձկնաբուծական կայաններ; Երբ կասկադի գործունեությանն ենք ուսումնասիրում, ապա տեսնում ենք, որ այն տարիներին երբ շատացվում է Սևանից ջուր բաց թողնելու քանակը , մեծանում է նաև կասկադի գործունեությունը, սակայն, նշեմ, որ էներգետիկ նպատակով շատ ջուր չի կարող օգտագործվել: Մենք մոնիթորինգի արդյունքում պարզեցինք, որ Ջրառատ գյուղի այդ տարածքում շատ ջուր է բաց թողնվել, մնում է պարզել, թե ինչու՞: Հատվածը, որտեղ ջուրը ողողել է հողատարածքները, երկու գետերի հատման կետ է՝ Մարմարի ու Հրազդանի: Մոնիթորինգի արդյունքում պարզեցինք, որ Հրազդան գետի մակարդակն է բարձրացվել, ոչ թե Մարմարի գետի»,-նշեց բնապահպան Արամ Գրիգորյանը:
Բնապահպան Սեյրան Մինասյանը տեղեկացրեց, որ Ջրառատ գյուղում՝ յոթ տարի առաջ նույն տարածքում, նույն խնդիրն է առաջացել՝ Սևանից շատ ջուր բաց թողնելու պատճառով. «Կասկածելի է, քանի որ, այս սեզոնին, այդ տարածքում այդքան ջուր չէր կարող լինել, և պարզ է, որ սխալ գործունեության արդյունք է; Ես առաջարկել եմ, որպեսզի Սևանից դուրս եկող ջրի վրա դրվեն հաշվիչներ, որպեսզի օնլայն ռեժիմով հաղորդվի, թե լճից ինչքա՞ն ջուր է դուրս գալիս: Մենք մոռանում ենք, որ Սևանը մեր երկրի համար կենսական նշանակություն ունի»,-նշեց Սեյրան Մինասյանը;
