Ժառանգություն» կուսակցության առաջնորդ Րաֆֆի Հովհաննիսյանը մի խումբ լրագրողների հետ զրույցում այսօր արտահայտեց իր տեսակետը ներքաղաքական իրավիճակի և եռյակի վերջին հանրահավաքի շուրջ ու անդրադարձավ հանրահավաքի իր ելույթին. «Ես դեմ էի, որ ցայտնոտային վիճակ ստեղծվեր և դրա համար ընդհատեցի ելույթն ու որոշեցի մոտենալ։ Հասկացա, որ իրենք պատրաստ չէին այդ միակարծիք որոշման»:
-Եռյակի հանրահավաքին Եվրասիական տնտեսական միության դեմ միայն Դուք խոսեցիք, և կարծիք կա, որ մյուս ուժերը չեն ուզում նեղացնել Կրեմլին: Առաջին նախագահն էլ ջղաձգվողներ անվանեց ԵՏՄ-ի անդամակցությանը դեմ արտահայտվողներին: Ի՞նչ կասեք այդ մասին:
-Հարգանքով եմ մոտենում յուրաքանչյուրի կարծիքին, հանրահավաքին հայտարարված կարծիքները տակավին անհատական կարծիքներ են, դրանք համակարգված ընդհանուր մոտեցում չեն հադիսանում: Համաձայն եմ այն պահանջի հետ, որ պետք ունենք շուտափույթ և ամբողջական իշխանափոխության: Բայց ես դեմ եմ, որ որևէ մեկի նկատմամբ գնա պիտակավորում և ածականների իջեցում: Նաև դեմ եմ, որ որևէ բան կոչվի անշրջելի: Մարդու մահից բացի, չկա անշրջելի բան: Ես հույս ունեմ, որ առաջիկա օրերը, շաբաթները ցույց կտան ավելի համակարգված և ամբողջական կոնսենսուս ապրած օրակարգ, որը կներկայացվի ժողովրդին: Ընդհանրապես չեն արտահայտվում ԵՏՄ-ի մասին, ես չեմ լսել, որ որևէ մեկն ասի այո կամ ոչ: Իրենք չեն ասում՝ կո՞ղմ են , թե՞ դեմ, պարզապես ասում են՝ անշրջելի է: Ես դեմ եմ ճնշմանը, ես կարծում եմ, որ մենք կարող ենք փոխել, մենք մեծ սխալ ենք անում, հակասահմանադրական որոշում է և առ ոչինչ ու կարծում եմ, որ լեգիտիմ, օրինական իշխանության արտահերթ հիմնումը միակ նորմալ մոտեցումն է թե՛ Հայաստանի ինքնիշխանությունը ապահովելու համար, թե՛ Ցեղասպանության 100-ամյա տարելիցին ընդառաջ՝ ունենալու համազգային համակարգված մոտեցում, որն ազդեցություն կունենա: Մեր քայլերով մեր ազդեցության ներուժը նվազեցնում ենք, և դա ո՛չ թուրքի, ո՛չ ադրբեջանցու, ո՛չ ռուսի մեղքն է: Ներքուստ թույլ ենք և պիտի պատրանք չստեղծենք, որ այս թուլության պայմաններում պիտի սարեր շուռ տանք և ճանաչման ու հատուցման հարցում մեծ արդյունքների հասնենք:
-Հանրահավաքի ժամանակ, երբ ժողովուրդը վանկարկում էր «հի-մա», ասացիք, որ պետք է քննարկեք առաջնորդների հետ: Սրանից կարելի՞ է ենթադրել, որ եռյակը հստակ չի որոշել իր անելիքները կամ էլ Ձեզ տեղյակ չեն պահել անելիքների մասին:
-Կարելի է ասել, որ մինչև իմ խոսքը այս ուժերի երեք բարձրագույն ներկայացուցիչներ առիթ չեն ունեցել քննարկել առաջիկա քայլերը: Ես դեմ էի, որ ցայտնոտային վիճակ ստեղծվեր և դրա համար ընդհատեցի ելույթն ու որոշեցի մոտենալ։ Հասկացա, որ իրենք պատրաստ չէին այդ միակարծիք որոշման և ուրեմն՝ թողեցի հաջորդիվ։ Վստահ եմ, որ առիթ կունենամ ավարտելու համար իմ ելույթը և գալու եզրակացության:
-Ստյոպա Սաֆարյանն ասաց, որ տպավորություն կա, որ «Ժառանգությունը» եռյակի լիիրավ անդամ չէ և որոշումների կայացման գործում ազդեցություն չունի: Այսինքն՝ ԲՀԿ-ն , ՀԱԿ-ը որոշում են, հետո տեղեկացնում:
-Գիտեք ինչ, ես կրկնում եմ …
-Ձեզ լիիրավ անդամ եռյակում զգո՞ւմ եք:
-4 ուժերի համագործակցությունը, որը հիմա ժամանակավորապես դարձել է 3 ուժերի համագործակցություն, խորհրդարանական համագործակցություն է և կարևոր ու աննախադեպ արժեք է, որովհետև պետք է շարունակվի: Պետք չէ խնդրին ծաղրով կամ հեգնանքով մոտենալ, սա կարևոր առաջընթաց է խորհրդարանական հետագծի մեջ: Բայց պիտի համապետական իմաստ ունենա, ժողովրդի պահանջը դա է:
-Սահմանադրական բարեփոխումների շուրջ ի՞նչ դիտարկումներ ունեք և ինչպե՞ս եք վերաբերվում կառավարման խորհրդարանական համակարգին:
-Խորհրդարանական լինի, թե՝ նախագահական, կապ չունի, որակի խնդիրն է, լեգիտիմություն է պետք, ժողովրդի վստահություն, որ հետո այդ վստահությունն իսպառ չկորչի: Երկրորդը՝ կան բովանդակային հարցեր, որոնք չենք ասում այսօր հրապարակավ, բայց խիստ մտահոգիչ են. առաջինը՝ նախագահի նշանակումը յոթ տարով, երկրորդը՝ Հայաստանի ինքնիշխանությունը սահմանափակող որևէ պայմանագիր հանրաքվեի դնելու դրույթը: Դա ի՞նչ է նշանակում, դա ուղղակի հակասահմանադրական առաջարկ է, որովհետև ներկա Սահմանադրությունն ասում է, որ Հայաստանի ինքնիշխանությունն անօտարելի է, այդ հոդվածը փոփոխման ենթակա չէ, և ես կարծում եմ, որ այդ հանձնաժողովը հակասահմանադրական առաջարկ է այն մասով, որ եթե պիտի ինքնիշխանությունը մենք զիջենք, պետք է հանրաքվեի դնենք: Որևէ պատրվակ պետք է չլինի, որ մենք ինքնիշխանություն զիջենք: Երրորդ՝ ես արդեն ասել եմ, որ շահերի բախում եղել է, որևէ անձնական վիրավորանք չկա, բայց այն դատարանի նախագահական անդամը, որը պետք է օրենքի սահմանադրականությունը որոշի, իրավունք չունի պարզապես ներկայացնել նոր սահմանադրության նախագիծը: Ես կարծում եմ, որ ներքին խութեր կան, ներքին վտանգներ, և սա պետք է ներկայացվի միմիայն նոր իշխանության ձևավորումից հետո:
-Գագիկ Ծառուկյանը չի բացառել առաջիկա նախագահական ընտրություններին իր առաջադրումը: Դուք ինչ-որ պատկերացում ունե՞ք Ձեր առաջադրվելու մասին, և եթե չառաջադրվեք, պատրա՞ստ եք սատարել նրան:
-Նման քննարկում չի եղել, կարծում եմ, որ այս հարցը և իմ ցանկացած պատասխան ժամանակավրեպ են: Գագիկ Ծառուկյանը ոչ միայն չբացառեց իր սեփական թեկնածությունը, այլև ասաց, որ պատրաստ է զորակցել նաև այլ թեկնածուի: Այդ հարցը երբեք չի քննարկվել, երբ հասնենք այդ փուլին, կերևա: Ես, ինչպես միշտ, ասել եմ, որ կողմնակից եմ թարմ ուժերի, թարմ դեմքերի, ինչու չէ նաև կին թեկնածուների:
