ԼՂՀ նախագահի մամուլի խոսնակ Դավիթ Բաբայանի հարցազրույցը.
- Պարոն Բաբայան երեկ «100-ամյակն առանց ռեժիմի շարժման» մասնակիցները ավտոերթ էին սկսել դեպի Արցախ, սակայն Բերձորում ոստիկանները նրանց մուտքը Արցախ խոչընդոտեցին: Ինչու՞, ինչն էր պատճառը:
- Արցախում հանրության գերակշիռ մեծամասնությունը դեմ էր այդ ավտոերթին, բացառությամբ մի քանի հոգու: Հիմանդիր խորհրդարանը գիտեր այս բացասական կարծիքների մասին, բայց նրանք չհրաժարվեցին այդ նախաձեռնությունից եւ փորձեցին երթով շարժվել դեպի Արցախ: Արդյունքում՝ տարբեր հասարակական կազմակերպությունների ներկայացուցիչներ, ազատամարտիկներ, բազմաթիվ երիտասարդական կազմակերպություններ, բոլորը երեկ դուրս էին եկել ընդառաջ, որպեսզի չթողնեին այդ ավտոերթի մասնակիցներին` մտնել Արցախ, որովհետեւ այն գաղափարաները, որ նրանք քարոզում են` հասարակության մեջ չի ընդունվում: Ոստիկանությունը ստիպված է եղել կանգնել այդ հարյուրանոց խմբի եւ երթի մասնակիցների միջեւ: Ոստիկանները հորդորել են երթի մասնակիցներին, որպեսզի նրանք հետ վերադառնան՝ ասելով, որ դա կարող է բերել անցանկալի զարգացումներ Արցախի ներսում:
- Դուք նշեցիք, որ բազմաթիվ հասարակական եւ երիտասարդական կազմակերպությունների ներկայացուցիչներ դեմ են եղել ավտոերթին: Անուններ կարո՞ղ եք նշել, ովքե՞ր էին դեմ:
- Բազմաթիվ մարդիկ, ուղղակի անհատներ: Ոստիկանությունը չթողեց, որպեսզի ինչ-որ բախում տեղի ունենա խմբերի միջեւ: Բայց մի քանի հոգի ոչ միայն չլսեցին այդ հորդորները, այլ սկսեցին ապակայունացնել իրավիճակը: Ոստիկանությունը ստիպված եղավ ուղղակի դիմել այնպիսի քայլերի, որպեսզի իրավիճակը էլ ավելի չլարվի: Դժբախտաբար կային նաեւ վիրավորներ, որոնց կյանքին բարեբախտաբար վտանգ չի սպառնում:
- Ի սկզբանե ոստիկանական մեծ խումբ էր բերվել Բերձոր, այդ թվում` զինված եւ դիմակավորված ոստիկաններ: Ինչու՞:
- Ոստիկաններից որեւէ մեկը զինված չի եղել:
- Լուսանկարներ կան հրապարակված, որտեղ երեւում են դիմակավորված եւ զինված ոստիկաններ` բարձունքի վրա:
- Գուցե ոստիկանության այլ ստորաբաժանում է եղել, բայց երթի մասնակիցների հետ խոսել են հենց ոստիկանության ներկայացուցիչներ, որոնք զինված չեն եղել:
- Ոստիկանության այդ ստորաբաժանման աշխատակիցները աջ ու ձախ կրակոցներ են արձակել:
- Ճիշտն ասած չգիտեմ, բայց եթե նույնիսկ կրակել են օդ, ապա դա երեւի սթափեցնող պահ էր, որպեսզի սթափվի ժողովուրդը:
- Այնուամենայնիվ ինչպե՞ս եք գնահատում ԼՂՀ ոստիկանության աշխատակիցների գործողությունները: Հիմնադիր խորհրդարանի անդամները նշում են, որ իրենք ետ դառնալիս են եղել, բայց ոստիկանները մահակներով հարձակվել են նրանց վրա, ծեծի են ենթարկել` նույնիսկ կանանց եւ երեխաներին:
- Ո՞նց կարող է այդպիսի բան լինել, այդպիսի բան անհնարին է: Եթե նրանք գնում էին ետ` ինչու՞ պետք է ոստիկանները նրանց վրա հարձակվեին: Ո՞վ է ասում, որ կանանց են հարվածել, որեւէ մեկը կնոջ կամ երեխայի չի հարվածել, այդպիսի բան չի եղել: Նորից եմ կրկնում` ոստիկանները կատարել են իրենց աշխատանքը, դա իրենց աշխատանքն է: Ոստիկանները աշխատել են իրենց լիազորությունների շրջանակներում:
- Ոստիկանները միջադեպի ժամանակ կոտրել են նաեւ երթի մասնակիցների ավտոմեքենաները: Դա նույնպե՞ս մտնում էր իրենց լիազորությունների մեջ:
- Գիտեք, երբ որ սկսվել է այդ ամենը եւ որոշ մարդիկ դիմել են սադրանքների, հասկանալի է, որ կարող էին նման բաներ լինել, բայց դա ուղղված չէր որեւէ մեկին վնաս տալու, ուղղակի նման զարգացումների ժամանակ այդպիսի երեւույթներ են եղել:
- Իսկ ոստիկանության աշխատակիցները պատասխանատվության չե՞ն ենթարկվելու, մեղավորներին ԼՂՀ իշխանությունը չի՞ պատժելու:
- Դա արդեն ճշտեք իրավապահ մարմիններից: Ոստիկանները իրենց աշխատանքն են կատարել եւ այս պահին ճիշտ չէ իրենց մեղադրել: Բազմիցս մենք Նախախորհրդարանի անդամներին ասել ենք, որ դրա ժամանակը չէ: Այդ երթը ի՜նչ կապ ունի Արցախի հետ, ի՞նչ եք ուզում, ի՞նչ նպատակներ եք հետապնդում, ինչու՞ եք Ապրիլի 24-ը կապում ինչ-որ ներքաղաքական վիճակների հետ: Արդյո՞ք սա բարոյական է: Ես չեմ հասկանում` ի՞նչ են ուզում այդ մարդիկ: Իսկ եթե ոստիկանությունը չմիջամտեր` շատ ավելի վատ կլիներ:
- Պարոն Բաբայան, Հիմնադիր խորհրդարանի անդամները նշում են, որ երեկվա միջադեպը ԼՂՀ եւ ՀՀ իշխանություններն էին ծրագրել: Սրա մասին ի՞նչ կասեք:
- Այս միջադեպը ծրագրավորված էր հենց իրենց կողմից: Փոխանակ ամբողջ Հանրապետությունը նրանց դատապարտի նման պրովակացիայի համար, փորձում են ինչ-որ իշխանություն, պետություն շահարկել:
Սկզբնաղբյուր՝ armtimes.com
