Թեև երեկվանից «Ֆեյսբուք» սոցցանցի որոշ օգտատերեր, չգիտես ինչու, նյարդայնացել են քաղաքական երբեմնի կարկառուն դեմք հանդիսացած Արշակ Սադոյանի՝ ԲՀԿ խորհրդաժողովի մասին արտահայտած կարծիքի հետևանքով, այնուամնայնիվ, analitik.am-ը շարունակում է զրուցել նրա հետ՝ Հայաստանում կատարված վերջին իրադարձությունների շուրջ: Այսպես, մեր հյուրն է Հանրային խորհրդի անդամ Արշակ Սադոյանը:
- Պարո՛ն Սադոյան , ինչպե՞ս կմեկնաբանեք Բերձորում տեղի ունեցած դեպքերը: Արդյոք Ժիրայր Սեֆիլյանի քայլը խելամի՞տ էր և ի՞նչ հետևություն կարելի է անել դրանից:
- Ժիրայր Սեֆիլյանը՝ ճանաչելով, թե ում հետ գործ ունի, պետք է նաև գնահատեր, թե որքանով է վտանգավոր իրենց քայլը: Վտանգավոր ոչ թե իրենց անձի համար, այլ վտանգավոր Հայաստանի համար, երբ, փաստորեն , իրենք՝ ելենելով, այսպես ասած, իրենց իշխանական ամբիցիաներից , պետք է գիտակցեին, որ Ղարաբաղի իշխանությունները թքած կունենան ամեն բանի վրա և կգնան մինչ վերջ: ԼՂՀ իշխանությունը մտածեց՝ «ո՞նց թե մեր ասածը չանի», քանի որ, ինչպես հասկացա, նրան զգուշացվել էր: Հայաստանի և Ղարաբաղի համար սա շատ վատ քայլ էր, որովհետև այն, ինչ տեղի ունեցավ, առաջին հերթին մեղավոր են Ղարաբաղյան իշխանությունները, իսկ Հիմնադիր խորհրդարանի մեղավորությունը նրանում է, որ պետք է հաշվարկած լիներ հետևանքները:
- Տարօրինակ չե՞ք համարում, որ Նախախորհրդարանը ցանկանում է հեղաշրջում անել հենց Ցեղասպանության 100-ամյա տարելիցի օրը: Սրա՞ն ինչպես եք վերաբերվում:
- Նույնիսկ անընդունելի է, որովհետև իրենց պլանները չի կարելի փորձել ի կատար ածել 100-ամյա տարելիցի օրը: Ի վերջո, դա հեղաշրջում անելու օր չէ: Ես կարծում եմ՝ Սեֆիլյանն այնքան միամիտ չէ, որ չհասկանա դա: Դրանք ուղղակի խոսքեր են : Իսկ այդ ծրագիրը շատ անհաջող ծրագիր է: Կարծում եմ՝ իրենք էլ դա լուրջ չեն ընդունում… Ուղղակի մի բան պետք է ասեն՝ ասում են, ուղղակի խելքներն էդքան է հերիքել, էդքան են ասել: Դա ծիծաղելի է և նույնիսկ անընդունելի , որովհետև վերջիվերջո 100-ամյա տարելիցի միջոցառումներին, հատկապես, որ դրսից հրավիրված են հյուրեր, բոլորովին իմաստ չունի ներքին խոհանոցի հարցերը հանել ամբողջ աշխարհի առաջ, առավել ևս , որ դա օգտակար չէ հետևանքների տեսանկյունից: Թեև նրանց այդ քայլը սխալ է , բայց, ըստ իս, ինչ-որ տեղի ունեցավ Բերձորում, պատճառը դա չէր:
- Իսկ ի՞նչն էր, ըստ ձեզ, պատճառը:
- Ուրեմն՝ նախօրոք զգուշացվել էր, որ էդպիսի բա չանեք, նրանք էլ ասել էին՝ չէ, պիտի անենք: Այստեղ, արդեն խոսում է պատվի զգացումը : Մի էլեմենտար պատճառով՝ հեղինակության, և թքած ունենալով, թե աշխարհն ինչ կասի ( ոնց թե մեր ասածը չեք անում և այլն), որոշել են պատժել այն մարդկանց, որոնք երեխաների և կանանց հետ գնացել են Ղարաբաղ՝ քարոզչության:
- Գյումրիի դեպքերի հետ կապված ո՞րն էր մեր իշխանությունների սխալը:
- Իշխանությունների սխալը միարժեք է՝ վախկոտություն: Ուղղակի, հենց այնպես հնազանդվեցին այն դեպքում, երբ մեր դատախազը Գյումրիում ժողովրդի մոտ մի բան հայտարարեց, բայց հետո՝ մեկ այլ բան : Այդպիսի վախկոտ իշխանության ներկայացուցիչը՝ դատախազը, առաջինը պետք է հրաժարական տա. դա իմ կարծիքն է: Վերջիվերջո, դու մարդկանց ասեցիր կանեմ, չարեցիր: Նույնիսկ, որևիցե խնդիր չկար թե՛ միջազգային իրավունքի տեսանկյունից, թե՛ ռազմաբազայի իրավունքի տեսանկյունից, և՛ նույնիսկ, ռուսական սահմանադրության տեսանկյունից, որ այս գործը պարտադիր ռուսական կողմը պետք է քննի և այլն: Այն, որ ասում են սահմանադրությամբ արգելված է արտահանձնումը . Ինչո՞ւ արտահանձնել: Հայաստանի սահմանում գտնվող մարդն ինչու պետք է արտահանձնվի: Նա Հայաստանի տարածքում է և պետք է մնա Հայաստանի տարածքում:
- Ըստ Ձեզ, ի՞նչ հանգուցալուծում կստանա այս գործը:
- Ես կարծում եմ, արդեն լուծումը հստակ արված է. Կասեն՝ դե, գիժ է, ինչ անենք, մենք մեղավո՞ր ենք: Ինչ կարող ես անել այդ դեպքում, գիժ է արել է … Բանակ կանչելուց առաջ գժի թուղթ են հանել , մի ամիս էլ պառկել է հիվանդանոցում… Գիժ էր, թող Ռուսաստանում ծառայեր…Ոչ ոք չի ասում, եթե գիժ էր, ինչո՞ւ էդ գժին ուղարկեցիք Հայաստան. Որովհետև սև ազգերի համար գիժն է՞լ է շատ :
Զրուցեց Հասմիկ Մովսիսյանը
