Analitik.am-ի զրուցակիցն է ՀՀԿ-ական պատգամավոր Մկրտիչ Մինասյանը:
-Պարոն Մինասյան, նախօրեին Հունաստանի խորհրդարանն ընդունեց Հայոց ցեղասպանության ժխտումը քրեականացնող օրինագիծը: Արդյոք հնարավոր համարում եք, որ այդ երկրի օրենսդիր մարմնի օրինակը «վարակիչ» լինի եվրոպական այլ երկրների համար:
-Համարում եմ, որ սա Ցեղասպանության 100-ամյա տարելիցի նախաշեմին լուրջ առաջընթաց է: Իհարկե, Հունաստանը եվրոպական առաջին երկիրը չէ, որ նման օրենք է ընդունում: Մի նախադեպ արդեն իսկ ունենք՝ Շվեյցարիան, չի բացառվում, որ նմանատիպ օրենք ընդունվի նաև Ֆրանսիայում՝ դատելով մինչ այժմ եղած նախաձեռնություններից: Հունական պառլամենտի օրինակը պարզապես ցույց տվեց, որ առաջադեմ մարդկությունը հերթական անգամ իրական գնահատական է տալիս պատմական դեպքերին: Հույն խորհրդարանականների այս նախաձեռնությունը ընդհանուր օղակի ընդամենը մեկ շղթան է:
-Կատարվածի առնչությամբ ինչպիսի՞ արձագանք եք սպասում Թուրքիայից:
-Հայոց ցեղասպանության ճանաչման մասով Թուրքիայից և անձամբ Էրդողանի քաղաքականությունից սպասելիքներ չունեմ: Միաժամանակ, կարող եմ ասել, որ այդ երկրում, անկախ բոլորիս կամքից, որոշակի գործընթացներ են տեղի ունենում: Եթե 20 տարի առաջ որևէ մեկն ասեր, որ հազարավոր թուրքեր դուրս կգան փողոց և կվանկարկեն «Բոլորս հայ ենք», նրան խեկլագարի տեղ կդնեինք, սակայն այսօր դա իրողություն է: Ակնհայտ է, որ պատմական իրադարձություններին իրական գնահատականներ են տրվում, իսկ թուրքական դիվանագիտությունն ու շահերը՝ փոփոխության ենթարկվում:
