analitik.am-ի զրուցակիցն է ԱԺ ՀՀԿ խմբակցության պատգամավոր Կարինե Աճեմյանը:
- Տիկին Աճեմյան, երեկ ՀՀ նախագահի կողմից խիստ գնահատականներ հնչեցին ԲՀԿ առաջնորդի և նրա կուսակցության հասցեին: Ինչպե՞ս կմեկնաբանեք:
- Հնչեցին տարբեր կարծիքներ, բազմակողմանի տեսակետներ, բայց այնպես չէ, որ այդ բնորոշումները վերաբերում էին կուսակցության բոլոր անդամներին, «Բարգավաճ Հայաստան» կուսակցությունում կան նաև շատ գրագետ, կրթված քաղաքական գործիչներ:
- Իշխող կուսակցության նախագահ Սերժ Սարգսյանն ասաց, որ երկար ժամանակ հանդուրժել է Գ.Ծառուկյանի սխալ քայլերը: Ինչի՞ մասին է խոսքը:
- Երկար ժամանակահատված կառուցողականության մեջ մեզ մեղադրել է հենց այդ ուժը: Իրականում, մեր կուսակցության նախագահը չափազանց հանդուրժող է եղել, որովհետև, իմ կարծիքով, կան գրված և չգրված օրենքներ և՛ քաղաքականության մեջ, և՛ քաղաքագիտության, որոնք չի կարելի խախտել, որովհետև երբ այդ օրենքները խախտվում են, խեղաթյուրվում է քաղաքական դաշտը, հատկապես այն ուժը, որը օրենք է խախտում՝ հայտնվում է ոչ բարենպաստ վիճակում:
Երբ հնչում են չափազանց վիրավորական արտահայտություններ, հերյուրանքներ և բամբասանքներ իշխանության հասցեին, որոնք արդեն հասնում են ծայրահեղ աստիճանի , այդ ուժը չի կարող իրեն այլընտրանք համարել: Նա կարող է դա անել, եթե չի գտնվում խորհրդարանում, բայց խորհրդարանում գտնվող քաղաքական ուժը պետք է կանոններին ենթարկվի: Այո հանդուրժող է եղել կուսակցության նախագահը, մենք էլ ենք հանդուրժող եղել, և դա բերեց նրան, որ հասանք մի կետի, որ ուղղակի այլևս չի կարելի հանդուրժել:
- Այդքան լռությունից հետո, ինչո՞ւ հանկարծ որոշվեց այսօր խոսել այդ մասին:
- Դա հանկարծ չէր: Երկրորդ՝ իրենք մեզ բոլորիս անընդհատ մեղադրում էին, որ մենք սեփականշնորհում ենք ցեղասպանության տարելիցի ծրագրերը իրականացնելու հարցը, մինչդեռ մենք պետք է համախմբվենք այդ հարցի և այդ ծրագրերի շուրջ , որը պետք է ներկայացնենք միջազգային ատյաններում: Կարևոր խնդիր ունենք և մեր խոսքն ու ասելիքը պետք է տեղ հասնի: Եթե մենք համախմբված չենք, եթե մի ուժը գնում է որևէ երկիր և չափազանց ծայրահեղ վատ բաներ է հնչեցնում իշխող ուժի մասին՝ մոռանալով, որ մենք խնդիր ունենք, ի՞նչ եք կարծում, մենք իրավունք ունե՞նք արձագանքելու: Իհարկե, ունենք, որովհետև մեզ համար առաջնայինը ցեղասպանության հարցն է , այն միջազգային կառույցներին հասցնելու հարցն է և հավուր պատշաճի այդ ծրագրերը իրականցնելը: Քաղաքական բոլոր ուժերը՝ թե՛ ընդդիմադիր, թե՛ իշխանական, պետք է այս հարցում համախմբվեն: Մնացած հարցերում, ես համաձայն եմ, կարող են լինել տարբեր գնահատականներ, քննադատություններ…մենք երբեք քննադատություներից չենք վախեցել, ընդունել ենք նաև կառուցողական քննադատությունները, բայց երբ ապակառուցողական մոտեցում է՝ ընդամենը իշխանափոխության հայտարարություններ, իհարկե պետք է պարտադիր դրանց արձագանքենք և դա ես տեղին եմ համարում:
Ես գտնում եմ, որ նախագահի վերաբերմունքն ադեկվատ էր և ընդամենը համարժեք պատասխան հնչեց, որին երևի թե իրենք չէին սպասում: Իսկ ինչո՞ւ չէին սպասում: Երևի թե այդ մարդը, քաղաքական ուժը, կուսակցությունը , որիցե քայլի գնալուց առաջ, այդ քայլերի հաջորդականությունը անպայման ճշտի և հասկանա՝ ի՞նչ է լինելու, և մտածի նաև հետևանքների մասին: Քաղաքական գործիչը պետք է անպայման մտածի իր կուսակցության և կուսակցականների ապագայի մասին , որոնք այդ կուսակցությունում ծառայում են իր գաղափարներին, եթե դրանք կան:
Հասմիկ Մովսիսյան
